A CLOSER WALK WITH ORGANIC FARMING – 44

RK Dawla
Mb 9366095658

1. Kan Mizoram zîm tê hi, leilung leh ram awih dan danglam bik tak, sik leh sa nuam danglam taka thuam kan ni a. Mi tam tak chuan, mi ram angin a rem lova, farming a buaithlâk a, a hlâwk ve tak tak thei lovin an sawi thin. Mi ram hmunhma zawl nuam tak tak leh thlai chinna thlûr sung mai, mechanised farm ropui tak takte kan mitthla tlat chuan, kan ram chu riang bik deuh tlatin kan hria a ni mai thei e. Mahsela, Pathian hian CHHAN mumal awm lovin, Zofate hi tlangram min pêk hi ka ring lo bur mai a. Phaizawl sawi tham nei lo mah ila, kan ram hi a intodelhin ram dang awh thamin thlai kan ching thei tih hi kan pawm mai tur niin a lang.
2. Zawl aiah tlâng a nih chuan, a surface area a lo zau ta a. Tlâng hi râwt ta ila, a thuthmun chu tlang pang hual vel zauzawng ai chuan, kan râwt zawl zauzawng chu a zîm hle ang. Chuvangin van-hawng zau dan thuhmun rengah phaizawl aiin tlangpang hi area a zau zawk ngial a ni. Tin, tlang tam tak thlûr sung karah kawrtui fîm leh thianghlim tak tak a thlur sung a. Thilnung dang chi hrang hrang awm tam theihna turin tlângram hian potential a ngah bawk a. Tlâng bâwk pakhatah pawh nikang mual, chhuah lam mual leh dàm (hmar-chhawng) mual a awm duah thei a, diverse takin thlai kan ching thei bik a. Sik leh sa thu-ah nise, phai khaw lum leh Himalaya tlang bulthutte angin a vawt lutuk emaw lum lutuk ve lova. Nupuiah khua a lum tia hahîpa kan sawi pawh hian, Mizorama kan maximum record chu 38°C chauh a la ni. India ram phaizâwlte chu 44°C te ania…inthlau tak kan la ni.
3. Mizoram chu Assam ram ang a ni lova, Assam entawn kha a tul lo. Switzerland nen kan sik leh sa a inang lova, chuvangin Switzerland tihdan entawn a tul hek lo. Mizoram hian kan sik leh sa leh kan tlang awih dan mil hian, farming system ngelnghet leh hlawk kan develop zawk tur a ni. Tunah hian theihtawp chhuahin, kan ram mil technology kan zawng mêk a, mite angin a sum leh pai zawngin tang lutuk thei lo mah ila, kan tum a ruhin kan taima thung a! Pathianin mal a sawm êm êm ang tih ka ring tlat a ni. Bul kan tan chauh nâ a, lawmna tur thil tam tak kan hmuchhuak nual tawh zawk a, chuvângin kum 10 a ral leh chuan, zangkhua a bungbu ngeiin kan ring tlat a ni. Mi ram mila kan ram enkawl kan tum tlat thin hian, harsatna kan insiam hnem zawkzia pawh a chiang chho zel ang.
4. Mihring kan tlem a, hrawk chawm tur kan ngah lova. Ram a thâwl a, hnathawhna tur hmunhma kan nei zau a. Sik leh sa nuam tak kan neih avangin, kumtluanin farming operation kan kalpui thei bawk. Kan neih lohte vanga lungngaia indawm kun lovin, kan neihsa Pathian malsawmna kan dawnte hriatchhuah leh hman tangkai kan tum zawk tur a ni. Phaizawl leh ramdangte anga lei-chi (chemical fertilizers) leh tûr (pesticides) hman chiam chiam hi keini ram awihpangah chuan zirtirna him lo tak a ni. Kan top soil kan sawp khaw lova, a kalral deuh vek a nih ngat chuan, siamthat leh a hautak êm êm tawh. Hmanni lawka Iskut ching uar leh thar tam thin Sihphir khan tunah chuan, Iskut an ti-rah hlei thei tawh lo! Leilung enkawl leh leitha hman chungchangah fimkhur zawka thil kalpui kan ngai khawp mai. Kum chanve chhung ruahtui dawng nghek a, kum chanve chhung khawro leh vang vang thin hi bulthutah hmangin, kan ram sik leh sa mil, soil ecosystem tichhe buaih buaih lo zâwng, mass production aia quality production nei thei turin mei kawha kan tan a hun e.