RK Dawla
Mb 9366095658
-- Advertisement --
1. December thla laihawl kan thleng a, khua pawh a vawh vanglai kan thleng chho mêk. Tuihnâ a tlem tan a, leilunga hnâwng awmsa pawh a huhil chak tan viau – khuhtu hnim hring or hnim ro nei lo chu. Thlai kumhlun chingtu tam berte buaina – leilung khawro – chuan kum dang ang bawkin a ze ngai a rawn chhuah dawn chho mêk a. Kan ram sik leh sa hi hlawm hnihin kan sawi thei ang a – leilung hnâwn that hun leh leilung khawro hun tiin. A eng zawk zawk pawh hi uchuak hlekin kan tawng ve ve a, hemi siamrem hi kan leilung leh thlai enkawl dan tur bulthut chu a ni ber a. Mi tam berin kan hriat hmaih thin chu, thlai kumhlun lian tawh-ah pawh, a kung bul 2-3ft bial tê kha mulch emaw tuipêk kha tha tâwkah kan ngai a. Hei hi a tha lutuk tho nâ a, tha ber erawh a ni chiah lo deuh a ni. A chhan chu thlai kumhlun lian tawh zungte hi an vâk thui thei êm êm a, an kung bul hnaiah chuan an zungsam (root-hairs) kha a tlem tawh zawk a, thlai zung tam ber (secondary roots) kha an vâk thui tawh a. Hei vang hian kan thlaite mamawh chu a mual muala hnâwng venhim or tui pêk kha a ni. Hetiang kan ti thei a nih chuan, kan thlaite hian thalah tui duh tâwk an hmu miau a, an than a tha-in natna leh rannung lakah an chhel êm êm bik thin.
2. Mizo farmer-te hian kan leilung hi kan chîk tâwk lo êm êm thin a. Lei thaw deuh (sandy) soil leh lei tak deuh (Loam or Clay soil)-a thlai chin tur bik kha a hrang a. A chin lohna tur hmunah kan ching a nih pawhin a enkawl dan bik kha a hrang zel thin. Tin, lei thaw deuh hi furah – tui a tlin rei theih loh avangin – a zung lam natna lakah an him deuh a. Mahsela, tui a châm rei lo miau a, thalah thlai zung a khawro hma thung. Thlai zung khawro chu a zik lam eng leh ro a thleng awlsam. Chutiang bawkin, lei tak deuh chu furah – tui a châm rei thin avangin – a zung lam natna a hluar duh a, thalah erawh an hrisel deuh. Mahsela, lei chunglâng a khawro a nih vêk vêk chuan, thlai mamawh khawp hnâwng siam turin chhah bika mulch (sandy soil aiin) emaw rei zawk tui pêk a ngai thin. Lei tak thaah chuan tui leih puat khan a luang puat a, lei chhungril a ti-hnâwng mai lo thin. Tin, lei tak deuh chu drip irrigation a fuh a, lei thawleng deuh chu sprinkler irrigation a fuh thung, kan hrethiamin a rinawm. Lei thawleng (sandy soil) chu tui far (drip irrigation) khan a ti-huh zau ve thei lova, thlai chaw tam tak lei chhungah a pût ral (leech) zawk thin. Tichuan, kan leilung azira thlai chin tur leh enkawl dan a hran theih dan tlangpui chu kan hrethiam thei âwm e. Hei hi kan hriat hmasak tur leh kan thiam hmasak tur a ni tlat a ni, leilung enkawl dan hi. Eng thlai nge kan chin dawn tih aiin a pawimawh hmasak daih a. Kan leilung mila thlai kan chin a, leilung mila chêt kan lâk chuan, harsatna a tlem bikin hlawhtlin a awlsam bik thin a, natna leh rannung vanga harsatna pawh a tlêm bik êm êm thin.
3. A mala thlai chin (Monoculture) hi Mizoram tân a tha lo bawk. Commercial farm, duhtawka leilung leh thlai monitor theihna hmunah chuan a zia zia dan a awm a. Mahsela, Mizo farmer nawlpui hi chuan kan tlin lo. Chuvangin, thlai chi khat chauh ni lovin, a pawlh tur thlai dang dah tel thiam hi seasonals leh perennial thlai tân a tul vek. Thlai kumhlun phei chu crop rotation kalpui a remchan loh avangin, ngei ngeiin thlai chi dang 4/5 tal awmze nei taka dah tel ngei ngei tur a ni. Kan thlai dah pawlh turte mizia leh nihphung erawh kan zir chiang hmasa ang a. Entirnan : Kuhva huanah chuan Nimbu leh Theihai/Litchi lam chin tel a rem êm êm. Kuhva a len hma hian nisa rum lutuk laka vên an ngai a, chu chu theihai/litchi kung khan an veng a. Kuhva a lo len (mihring ban aia sâng) an lo nih tan erawh chuan, kuhva khan a chung bera awm a, nisa dawn hmasak a lo mamawh ta a. Chutih hunah chuan, theihai/litchi kung kha ‘prune’ hniam ve thung tur a ni. Tin, Nimbu hian partial shade a mamawh zawk a, hmun dàm lutuk a nih loh chuan. Chuvangin, kuhva hnah kara ni êng rawn lut hlek kha a ngeih tâwk thei ta chiah thin. Hetiang deuh hian kan thlai chin leh leilung enkawlna kawngah ngaihtuahna lam inhmakhua kan ngai em em e.