A comeback fight-ah Pacquiao chak zo lo

A comeback fight-ah Pacquiao chak zo lo
Kum 46 mi ni chungin boxing a chawlhsan atanga kum li hnuah Inrinni khan hruihrual chhungah Manny Pacquiao a kirleh a, Las Vegas khawpuia inhnekna hmun hmingthang MGM Grand-ah ngei WBC welterweight champion Mario Barrios a hmachhawn a, chak zawk awm loin fighter pahnih an inhnehtawk.
Professional fight tum 74 a hmachhawn tawha vawi 62 chak tling Filipino leh American inhnekah khan judge pakhatin 115-113-a Barrios a dahsan zawk laiin endiktu dang pahnihin point 114-114 ve ve an pe a, chak zawk awm loin WBC welterweight title fight a zo a, mipui lungawi lo leh Pacquiao chak zawka ngai fans lamin a title kawl lai humhim Barrios leh an point score chu hall chhung khawk rum rumin an ‘boo’ khum!
Weight then hrang pariata world title 12 la tling tawh Pacquiao pawhin kha inhnekah khan chak zawk ngeia a inngaih thu leh fight ropui, chungnung filawr zawk awm lohna niin a sawi a, a tumpui chu a khawng takzet thu leh ‘rematch’ neih leh ngei a duh thu a sawi.
Kum 2019 khan kum 40 mi niin welterweight title hi a lo hlawhchhuak tawh a, kha mi tum khan he title la thei upa ber niin, kum ruk hnuah a beisei leh a, amah leh fans engemawzatin chak zawkah pawm mah se judge-te point pekah an inhnehtawk a, title thaptu kutah title a kirleh ta rih a ni.
Fighter-te zingah International Boxing Hall of Fame-a lakluh an nih hnua major world title la leh thei hi khawvelah an la piang chhuak lo a, thlahmasa maia sengluh Pacquiao hian record thar a siam teuh viau a, ani pawhin a puitlin zo ta bik rih lo a ni.
Inrinnia inhnek lian hmachhawn tur khan Pacquiao hian training camp-ah thla hnih hun a hmang a, a lan dan maiah chuan a inhnek hnuhnunber tum kum 2021-a Yordenis Ugas a hneh loh tum ai pawh khan a taksa pian leh che vel a dik zawk mah a ni.
Kha inhnekah khan Pacquiao khan a kuttum vawi 577 a chhuahtir atangin tum 101 (17.5%)-in a tumpui a fuh a; Barrios khan vawi 658 hnekah tum 120 (18.2%) fuhin, hnek fuh satliah ni lo, na thama fuh (power punch)-ah chuan Barrios (75) aiin Pacquiao (81) a chungnung zawk thung.
Kumin May thla khan Philippines sawrkar inthlanpuiah Pacquiao hian senator nih leh tumin chuh mah se a tling zo ta lo a, a hman ta deuh bawk nen WBC rules-in champion hluite tan chawlh an hnuhkira boxing an luhchilh lehin title chuh theihna dan an lo nei bawk nen hruihrual chhungah world champion nih leh tumin Filipino a inlan leh ta a ni.
Mayweather rematch?
Pacquiao nena inhnek nawn leh a hreh loh thu Barrios pawhin sawi ve bawk mah se Filipino hmachhawn leh tur hi a la chiang lo a, Pacquiao manager Sean Gibbons chuan chanchinbumite hnenah an bout khelh leh tur chu Barrios aia hming hraw zawn nen ngei ni se tih an duh niin a sawi a, Floyd Mayweather chu Barrios aia hming chungnung zawk a nih thu a sawichhuak zauh!
Gibbons chuan, “Barrios kha boxer tha tak leh ka ngainat zawng tak pawh a ni ngei mai a, mahse, Manny chu a la hraw deuh zawk awm e.
“Fighter dang Gervonta ‘Tank’ Davis leh (Rolando) ‘Rolly’ Romero-te pawh an la awm thei tho ang chu,” tiin Pacquiao hmachhawn leh tur ni thei awm hming a lam ri.
WBA regular welterweight champion Romero hian kumin May thlaa Ryan Garcia a hneh hnu khan a tum leh tur a la tichiang lo a; Davis hi lightweight division-a khel a ni bawk.
He boruakah hian kumin chhung ngeia inhnek leh hman ngei duh Pacquiao hian a elpui kumhlun Mayweather nena ‘rematch’ neih a sawibo lo.
“Mayweather hi boxing-ah kirlehin contract a ziak a nih chuan kan inhnek ang. A duh phawt chuan kan intawng nawn leh tur a ni. Tunah kei chu ka active leh tawh e,” tiin a hneh loh hnu American tan zau takin kawngkapui a hawng!
Karhmasa tir lam khan Filipino hian Mayweather chu fight tak tak pumpelhna zawng leh exhibition bout duhtawk lekah a lo puh tawh a ni.
Kum 2015 khan fighter ropui pahnih hi WBC, WBA leh WBO welterweight title inchuhin hruihrual chhungah an innuai tawh a, unanimous decision-a chak Mayweather chuan hneh loh nei loin boxing a chawlhsan a, tun thlengin a la hawikir leh ta lo a ni.