A GUIDE TO SMART FARMING – 38

RK Dawla
Mb 9366095658

1. September chawlhkar hnuhnung ber kan thleng ta a. Ruah pawhin kian lam a pan chho ta niin a lang. Kumin atân ruahtui mumal dawnna chance kan nei sâng tawh lova. Chuvangin, leilunga hnâwng vawnhim leh siambelh lamah tan kan lâk thiam a tul chho viau âwm e. Mithiamte chhût dan chuan nakum kumtir lamah pawh hian (kumin ang deuh thovin) thal a rei dawn hmel a. El Nino thlen leh theihna chance hi (nakum kumtir atân) 95% vel a ni tawhin Narional media-ah kan hmu leh tawh a ni.
2. Kan khawvel hman chhoh mêkah hian, sik leh sa a mumal lo chho zel dawn niin a lang a. Hei vang hian ruahtui hun bi insawn nasa, leilung hnâwnnna tlahniam etc hmachhawn turin inbuatsaih chho ila. Tin, huan lu bera tui khamkhawp dahkhawl theih hi intihhmuh kan ngai chho hle bawk. Tui hna nei, gravity-a la thleng thei kan nih phei chuan, huan chhungah tui khawlna siam thluah hi a hlu chho hle dawn a. Gravity hmanga tui la thei lo tân pawh, tunlaiah chuan thil a awlsam tawh a, diesel leh solar hmang pump tha tak tak kan ban pha tawh bawk a. Hengte hi hmang tangkai ila. Thlam tha ai chuan tuidahkhawlna tha kan mamawh zawk êm êm a ni. Farming-ah chuan pawimawh hmasa hriatthiam leh thlan thiam hi thil pawimawh lutuk mai a ni si a.
3. Thlasik thlai chin a hun chho malh malh bawk. Hetih ruala kan hriat tel tur tha tak chu – thlai chi 2/3 chinpawlh thiam leh leilung hlutna neihsa vawnhim lam kha a ni. Thlai chi khat kan chin tlur hian natna leh rannung laka tawrhna a hluar duh a. Kumdang lehzela thlai chin nân leilung a da chak bawk. Entirnan – Tomato chingtute tân purun lam chin tel hian rannung tam tak a hnawt bova, chubâkah tomato a pâr chiah tih khan Bean-thu tuh ila, tomato rah vanglai a pelh chiah khan bean a rawn thar ve a. A tihchi êm êm. Bean-thu pawh hi a nâ lo chi a awm a, chutiang kher chin chu a fuh deuh.
4. Thlasik thlai ching thinte tân, kan chinna tur hmunhma kha lo buatsaih lâwk a fuh êm êm bawk. June-July thlaah thlasik thlai kan chinna tur hnim kha silpaulin dum hmanga khuh hlum te, thingtum leh mau hmanga lo delh beh lâwkte kha a tangkai êm êm thin. Hetianga hnim sawisak lâwkah hi chuan, thlai chi leh tiak a him bîk a, leiah thlai chaw tam tak a lo inchhawp lâwk thin a ni. Mizote hi thil zirchiang peih vak lo, sum duh hmanhmawh ringawt kan tam viau mai a. Hetiang farmer-in thlai kan han ching thin hi chu pawi thei a va tam tak êm… Pest Management bikah pawh rannung leh natna hmuh rual ruala, “Engin nge kah turt” ti deuh tawp thin kan tam mah mah. Hetiang chu a dik lo. Chemical pesticides-te hi kan ngam lutuk rêng rêng bawk. A nihphung leh hlauhawm dan hre fumfe mang si lo, a thawh chak dan ringawt sawi theite kut-hnu kan ei chhung hi chuan, hnam hrisel kan nih beisei ngam a har khawp ang.
5. Hmunhma neih zau hi farmer tam tak zingah insawitheihna tur emaw ti kan awm teuh bawk. Enkawl (monitoring leh management strategy) dan mumal nei si lova, fahrah puan hlai duai mai hi chu, engti kawng zawng pawhin, a thatna sawi tur tam a awm lo. Tunlaiah chuan production per area hi miin an chhût tawh. Ram zauzawng inang rau raua thil thar hlâwk kha miin an buaipui tawh. Chutih lai kara hmunhma zau, enkawl hneh loh tur tih hriat reng reng, kan han hlai pawp thin hi chuh….âtna chi khat hi a ni chiang khawp a!