Naktukah Pro Fight khel tur inbuk dawn

Asia khawmualpuia championship suanluh a ngeih lo emaw tih turin intlansiak hnuhnungber Singapore Grand Prix-ah Formula One hmahruaitu Max Versta-ppen chuan lawmman semna dawhsan a luah pha ta lo a, Pathiannia Suzuka tlankawnga Japanese Grand Prix-ah erawh pole position atanga tlanchhuakin Dutch driver-in pakhatna dinhmun a luah leh ta a, a team behchhan Red Bull pawhin a zawnaa kumhnihna atan constructors’ title an la fel ta bawk.
Kartawp hnehna kha season kal lai intlansiak vawi 16-a Verstappen tum 13 chakna ni tawhin, championship-a a elpui lianber leh a team-mate ni bawk Mexican Sergio Perez a tlanchhuah zawh loh avangin Dutch driver ropui tan a zawna world championship title pathum a lakna tur a hnaih zual zel.
Japan ram Grand Prix podium-a kan hmuh ve dangte chu McLaren driver Lando Norris leh pathumna Australian rookie Oscar Piastri-te niin, tun kha Piastri tan lawmman semna dawnsah a chuankai vawikhatna a ni nghe nghe.
Verstappen hian fastest lap ken tel point rut telin, driver standing-ah point 177-in Perez nen an inthlau ta a, thla thara Qatar Grand Prix an tlan hunah hian intlansiak vawinga la awmah drivers’ title lak theihna hun remchang a nei thei dawn.
Red Bull tan kum 2005-a an team din a nih hnuah kumin hi constructors’ title vawiruk an lakna a ni tawh.
Ferrari khalhtu Charles Leclerc chu Suzuka tlankawngah palina niin, tum sarih ngawt world champion ni tawh Lewis Hamilton chuan panganaah Mercedes car a thlenpui a, Singapore-a lawmman semna dawhsan chungber luahtu Ferrari driver Carlos Sainz chu parukna a ni.
George Russell chuan Mercedes car chu pasarihna nihpuiin, a hnungah Aston Martin driver Fernando Alonso leh Alpine pair Esteban Ocon leh Pierre Gasly an indawt.