A GUIDE TO SMART FARMING – 44

RK Dawla
Mb 9366095658

1. November thla kan chuangkai ta. Boruak ro (low relative humidity) vangin leilung hnâwng a huhil chak a, thlai natna tam ber pawh a darh chak lo deuh thin. Antam lam chite (Brassica) leh vaimim (cereals) tih loh chu an hnah leh kung huh theia tuipêk loh a tha tlangpui. Tin, thlasik thlaite hi an hnah hnuai lam hian natna a man duh bik a, paih chak a ngai ve fo thin. Tin, tui kan pêk pawhin, zan dài tlà-in kan tuipêkte a puih theih hun, tlai nêmah, ni êngin thlai a chhun tawh loh hnu-ah pêk a hlâwk thin.
2. Tin, thil engpawh ti dawn ila, thutlukna kan siam hma-in, kan inpuahchah dan tur ruahman fel a tha hle. 2024-ah engemaw kan buaipui dawn a nih chuan, 2023-ah ruahmanna engkim kan lo peihsa vek a tul. Tlachawp lutuka thiltih chu vanneih ngai tak thil a ni thin a. Harsatna a lo thlenin a pun-lun châwk thin. Chuvang chuan, lo inbuatsaih lâwk tluk a awm thei lo. Farmer tam tak hian midangte fak mawi thlai leh midangte hlawkpui thlai (nia kan hriat) bawh ve ngawt kan ching a. Hei hian that lohna tam tak a nei thei. Kan leilung milzawng thlai kan thlan thiam a pawimawh hmasa a, kan tha leh hun, knowledge leh hmanraw neihten a zawh tâwk hriatthiam a pawimawh bawk.
3. Tun hunah hian thil tlo tur kan ngaihtuah a tul hle tawh bawk. Rampalaileng kan vât dar a, season khat atân thlai kan ching a. Kan tifuh a, kan thar tha a ni mai thei. Mahsela, kan eiral a, kum lehah a ngai tê bawka a bul atanga tan a ngai leh a nih chuan, a fel ber lo thei. Kan ram enkawl hian kum engzat chhung nge min daih theih ang a, kan thlahte thlengin keini angin rawn buaipui ta nise, kan tharchhuah hi a SUSTAIN thei ang em tih kha kan ngaihtuah a hun ta… Chutiang atan chuan mahnia leitha insiam te, tui lâk te leh leilung kalral tur vên chungchangah te ruahmanna felfai tak kan ûmzui a tul ta thin a. Vawiina kan puarna ringawt piah lam deuh, kum lokal leh zel tur thlenga kan chhawr theih tur kan ngaihtuah a hun tawh a ni. A châng chuan thutlukna serious tak tak kan siam a tul fo thin a. Hetiang hunah tak hian nikhaw rei hnu kan ngaihtuah phâk a tul hle.
4. Hringnunah hian thil pawimawh berte zinga mi chu beiseina a ni âwm e. Farmer-te pawh hian kan hmalam hun atân beiseina kan neih a tul hle. Tlachawp atâna beisei te, kum khat atân leh kum 5/10 hnu thlenga beiseina kan neih a pawimawh thin. Tihtur tha dang hriat loh vânga hunawl hnawhkhah nân ringawt chuan farming hi a uihawm a. Chhungkua leh khawtlang, ram ang pawha hmasâwn dawrhna tham potential Mizoramin kan neih langsar tak chu FARMING hi a ni. A chhan chu kan ram leilung a tha a, ram mipui hmun li-a thena hmun 3 hi kuthnathawk kan ni. Heti taka mipui proportion tamin hma kan sâwn chuan ram pumin hma a sawn ngei ngei ang. A nihna takah chuan kan GSDP sàn chhan factor lian ber chu sawrkar hnathawkte an ni. Kuthnathawkte tharchhuah leh dinhmun hian chuti lua chu a thleng lo tih chu a hretu mai ni lovin a hmutute vek kan ni. Thingtlang kilkhawr atanga khawpui daifêm thleng hian, farming hian min chiah-chhuak vek a. Hmabâk kan neih ên lohzia hi hria-in ngaihtuahna thar nên thutlukna kan siam a hun tawh takzet a ni. Kuminah ngaihtuah la, inbuatsaih nghalin nakumah umzui ang che.