RK Dawla
Mb 9366095658
-- Advertisement --
1. Ni 16-17th.Nov-ah ruahtui a ram pum huapin kan dawng niin a lang. A lawmawm hle. Buh seng mêkte tân erawh buaina tlêm a hnutchhiah hlek âwm e. Chuti lovah chuan, leilung leh kan thlaite tân malsawmna hlu tak a ni ngei ang. Thlasikah chuan boruak a ro avangin, hnim leh thlai ruangin a khuh that loh leilung chu a ro chak êm êm a. Thlasik thlai ching thenkhatte pawhin tun ruahsurin thlai than a puih dan kan hmu ngeiin a rinawm. Thlaite hi leitha pe eng ang pawh ni ila, tui tello chuan awmzia a awm tak tak thei lova. An tona leilung hnâwn dan kha a pawimawh êm êm thin. A bikin thlai chinna tura khur laih emaw lei lehphut hian tui an heh zual êm êm thin.
2. Kan ramah chuan thlasik khaw ro hi thal khaw lumin a zui nghal thin avangin, leilung enkawl dan thiam leh thiam lohvin thlai a nghawng nasa êm êm a. Kan rin phâk bâkin thlaiin thala stress an tawrh hi a nasa thin. Kumtir lam thal khawro lutukin a hmeh thlai kumhlunte hi kum tawp lamah an hnah leh zar a eng chiam fo. An chawrno leh tui mamawh hun laia duh ang tâwk hmu lo chu, a hnu-ah hmu tha leh viau pawh nise, ngai a awh tak tak thei tawh lo thin. Hei hi Mizoram hmun tam bera thlai kumhlun chingtute problem a ni. A hunlaiin thlaiin tui a hmuh that theih loh chuan, a than tur angin a thang thei lova. Chauhna (stress) a tuar ta a. Chu chu rannung leh natna-in an bawh buai zui duh êm êm a ni.
3. Mizoram hi zîm tê tiin kan sawi thin a, mihring pawh kan thâwl êm êm. India ram state dangte ngaihtuah chuan. Kan state intodelhna khawp ram âwl hi chu kan la ngah viau niin a lang. Ram âwl kan hman tangkai dan erawh hmasawnna tur a la tam êm êm. Hetih lai hian, National News-a kan lo hmuh danin, thingtlang atanga khawpuia pêm luh (urbanisation) a hluar ve hle. Kan ram a zim hle na a, Mizoram mihring zatve aia tam khawpuia chêng kan ni mauh mai hi ngaihtuah a tithui hle. Khawpuia pêm luh hi khawvel kaldan phung pangngai a ni. Mahsela, kan pêmna hlatdan hi a thui lo êm a ni. 100-150km lek lek atanga khawpuia kan pêm lût hian, thingtlang lam dinhmun a hrilhfiah chiang viau âwm e. Infrastructure tha tak nei ila, inhlawhfa chawp tura khawpuia pêm luih luih hi chuti lutukin kan uar a rinawm loh. Leilung behchhana eizawng tur tân chuan, facility tha deuh sela, khawpuia pêm chiam thu a awm lo rêng rêng!
4. Tun hunah hian kan mihausaten thingtlang lama ram neih an intihhmuh nasa hle a. A eng chu an hria ni dawn mawt Compensation beisei vang a nih chuan a chiang mai a. Mahsela, chulam biahthu pawh ni chiah lo, ram va neih hrim hrim an intihhmuh hi chu nuih a za deuh thin. Farming an tui aniang ti dawn ila, a zei lo tha tha, a fit lo tha tha an ni ang lawi a. Eizawnna nghet an dap aniang ti dawn ila, an kum leh ni thlirin rei hnathawhna tur hun an nei tawhin a lang si lo, decade khat a liam ang a, tiang hawlin an kal chang chang emaw chauh a ni dawn si a! Engpawhnise, kan intihhmuh laklawh mai mai niin a lang zawk. Mi tam tak ram neih dan hi chuan, Revenue dept file an ti-hnawk mai mai a ni. An chhawr tangkai tak tak dawnin a lang lo. An tu leh fate lah chuan, kuthnathawh chu khawi lam, fashion leh eiphung changkangah an duhtawk an hmu tlangpui niin a lang si… Pawimawh chu, kan ram neih dan hi enfel a ngai a, Land reform hi kan tih vat a ngai a ni.