A GUIDE TO SMART FARMING – 47

RK Dawla
Mb 9366095658

1. November thla tâwp kan lo thleng leh ta a. Hmun tam zawkah chuan leilet leh tlangrama buh chinte kan seng zo tawh âwm e. Vairamah chuan an buhpawlte, bawngchaw atân an chhêk vûm nasa tih kan hmu fo ang a. Keini ramah hian buhpawl kan hmang tangkai zui mang tlat lo mai a. Hei hi thil uihawm tak a ni. Fasuara kan paih liam buhsî hi pho rovin, mût ila. A hawl chu Carbonised rice hull an ti a, thlai bi-a pawlh atân leh compost-a telh atân a tha êm êm a. Amah kha leitha ni lovin, leilunga hrik tangkai tipungtu leh boruak + hnawng keng tângtu atân duhthusam a ni. A tawih ve theih tawh loh avangin, a kalral a nih loh chuan, Pathian lokal leh hma a daih a!
2. Buhpawl hi a hmanna a tam êm êm. Thlai bul mulch nân a tha lâwt lak a. Buhpawl hi a CN ratio chu 60 vel a ni a. Vermicompost leh compost item atân a tha chuangkuang viau. Ran-êk uptawih nân buhpawl leh changel chansawm aia tha ka la hmang lo, a tluk a awm lo. Thildanga kan hmang remchang lo a nih pawhin, buhpawl kha, a kâra hnim awmte nên Brushcutter hmanga khawmin, chhep vum ila. Chawlhkar tin tui kan pêk peih chuan, nakum March thla-ah chuan a tawih zo deuh vek ang. Buhpawl tawih chak nân hian ran êk tuia thlawr a tha hle bawk. Buhpawl tawih chu carbon a tam êm êm a, high carbon compost emaw fungal compost tiin kan sawi thei ang. Chu chu Mizoram leilung zawng zawng mamawh a ni âwm e. Leilet phur 50 thar theihna hmuna buhpawl zawng zawng kan chhehkhawm kha a lo tawih chuan, Pik-up trip khat vel compost a chhuak chiah a ni.
3. Tin, Ran inah (a bikin vawk leh bawng), Ran In chhuata dah atân a tha hle bawk. Ran zunte hi an êk aiin thlaiin an ngeih zawk a, dahthat erawh a harsa thung. Hei tak hi buhpawlin zun a hîp hul chiah khan, buhpawl kha uptawih a nuamin a tawih leitha kha a ‘cial êm êm tawh thin. Ran zun kha kan dahtha a ni nghal bawk. Ran zunte hi direct-a thlai bula kan hman hian, leitha tam tak boruakah a kalral (volatile) thin a. High carbon material (thingzai nawi or buhpawl)-a inchiahzawp tir khan boruaka leitha kalral hi a vêng êm êm a ni. Vai leitha man tam tak takin kan lei a. An thawk thuai a, a tlo lo êm êm. Lei an tichhe zui ngei ngei bawk. Mahsela, mahnia kan insiamchawp, uptawih leithate hi chuan, lei an titha tulh tulh a. Lei nihphung an siamtha telh telh a, hnim pawh a tlem phah a. Thlai natna leh rannung pawh a nghal nêp bik thin.
4. Kumthara thar-hma-tur thlai (off-season) chinna tur atân pawh, buhpawl hi hman a remchâng êm êm. Dawnfawh lian leh Changkha ching turte tân pawh thil hlu lutuk a ni. Thlai bi tura kan duhna lai kha, ran-êk neih ang ang, leiah phul kual tawp ila. Chu chu buhpawlin 3ft vela zau, nem muka 6 inch vela chhahin chhilh leh ila. February thla velah thlai kui tiah kha a phunluh nghal hmiah theih. Khur laih ngai lovin. Khur lai a, leilung tihchêt nasat a nih lova, leilung kha uap no a nih miau avangin tuipêk a hautak lo êm êm a. Hnim pawh a awm mang lo thin. Thlai bi zing deuh turah (4ft spacing aia tlêm)-ah phei chuan, buhpawl kha mual vangtan zawngin, a inzawma chheh phei kha a tha-in a remchâng êm êm bawk. Tunkârah leilung kan buatsaih a, kan let-chawp emaw khur kan lai a. Karleh-ah thlai kan phun lût nghal a. Hetiang tlachawp lutuk hi thlaiin an ngeih har thin. Natna pawh a tam duh. Buhpawl hmanga mulch hmasak leilungah erawh natna leh rannung case a tlêm duh bik êm êm. Kan hman tangkai ngai loh, tangkaina ngah si hmanruate hman thiam hi Mizo farmer-te hmasawnna rahbi tur lian tak a ni e.