A GUIDE TO SMART FARMING – 48

RK Dawla
Mb 9366095658

1. 2023 thla tâwp ber kan thleng leh ta. Kumtir lamah thâl kan tuar hlek nâ a, November rain bâkah December rain pawh tihtham kan dawng dawn niin a lang a. Chhinchhiahtlâk leh lawmawm tak a ni. Kum dang kal tate kan ngaihtuah chuan, thal ruah kan dawng mumal lo êm êm a. Khawvel lo lum zel hian, kan ruahtui dawn dan hunbi a tidanglam chho viau a. Chuvangin, kumin kumtir lam bul kan tan dan chu tha lutuk lo mah se, kumtâwp lam kan khâr dan erawh a tha khat viau e – a ruahtui ang zawng chuan.
2. December – April chhunga leilung khawro lutuk hi, favang tâwp lamah thlai kumhlun hian an tuar ngei ngei ti ila, kan sawi sual âwm love. Thlai kumhlun hnah zîk lam eng (micronutrient tlachham) leh rah mumal lo bâkah natna leh rannung tam tak hnuhma an tawrh phah tlangpui thin. A bikin nikang lam leh lei thaw deuh hmunah chuan, thâl leilung ro lutuk hian pawi a khawih thui êm êm thin. Farmer tamtak hian kan huan thlai enkawlna chungchangah, tui lâk emaw tui khâwlna hi ruahman hmasakah kan nei tel lo fo thin. Hei hi kan sik leh sa lo danglam zel ngaihtuah hian, thil pawi tak a ni chho telh telh dawn. Tuilâk ngaihtuah tel lova 3 Hectare thlai dahluh nghal ai chuan, tuilâk buaipui nghala 1 Hectare-a zaua bultan hi a hlawk zawk tih kan man thiam a ngai e.
3. Tin, thlasik a ni a. Thilto kumhlun zawng zawng deuhthaw-in hnah hrâmchang an tlâktir hun a ni mêk a. Tun dinhmunah chuan, Mizoram pumpuia kan lo/huan enkawl dan nawlpui en hian, lei chunglâng hâng kalral a nasa tlangpui a. Hei vang hian leiin tawihthli (organic matter) a ngah lo tlangpui tawh a. Helai tak hi a siamrem lam kan hawi a pawimawh takzet tawh a, chumi atâna season duhthusam chu kan thleng mêk a ni. Ramhnuaiah zêm lian tak kualin, thing leh mau hnah tla rût khawm a, Zêmah vawm luh a, rah-muk ngial a hun e. Heng thing leh mau hnah tlate hi a tawihtir thuai duh tân ran-êk a vawmluh theih a. Vawmlut lo pawh ni ila, changel kung chansawm chauh telh pawhin thla rukah chuan a tawih zo tlangpui a. Chumi leitha chu kan huan leilungah a tuha kan tuh chhuah a ngai a ni. Tichuan, kan huan/lo kan vah tirha kan leilung thatna kha kan nei lêt leh thei ang. Chutiang a nih loh chuan, vai leitha hrang hrang hmanga tan lâk kan ngai a ni mai. Heng vai leithate lah hi thawk chakin thawk tha viau mah se, lei an tichhia a, leilung kumhlun siam tûr chuan rinrawla neih chi an ni lo. Reilotê atân bâk thil a chingfel lo, chemical leithate hian.
4. tawih thei thil ro leh leivung hmanga thlai bul khuh kan sawi thin a. Thil tha tak pawh a ni, thlai naupang deuhah chuan. Mahsela, thlai a len tawh chuan, a zung a kal thui tawh a, thil ro hmanga khuh/mulch sên chi a ni tawh lo thin. Hetah tak hian, kan ngaihtuahna kha kan huan mual pumpui ang zawnga kan hman thiam a tul ta thin. A tawi zawngin, thlai kumhlun huan leilung chu hnim hringin thlasik laia a khuh theih kha a pawimawh ber. Hnimte hian nisa leh ruahsur direct lakah leilung an vêng a. An zungah khan thlai mamawh leitha (root exudates) an pechhuak reng bawk. Hnim pakhatin exudates a pekchhuah kha tam tham lo mah se, a mual muala hnim chi hrang hrang, a nuaia nuai chuang tehmeuhin exudates an pêkchhuah kha chu tangkai tham takzet hi a ni tawh a. Kum 3 chhung regular taka hnim control lova kan manage a nih phei chuan, kan leithatna tam tak kan vawnghimin kan siam pung thei dawn a. Heti lam hawi zawnga inzirtir hi kan mamawh khawp mai. Pathianin khawvel a siam dan phung han en hian, leilung ruak mai chu a dik thei lo a ni. thalah eng hnimte nge kan huanah awm thei tih kha farmer-in a zirchian a ngai tawh zawk a ni. Kan thlaite natna leh thar hlâwk theih loh chhante hi a lêra thuai mai lovin, a bulthut atanga kan zir a, kan beih chhoh a ngai tawh zawk a ni.