A GUIDE TO SMART FARMING – PART 9

By RK Dawla
Mb 9366095658
1. March ni 6 a ni a, Spring season kan hmang mêk a. Thei leh thlai kumhlunho an rawn chawrno tharin, pâr an chhuah nasa a. Chutih laiin, lei thîl leh pialtlêp hmunah erawh, lei ro lutuk vangin thilto hnah a ro thawt thawt bawk. Lo hâl hun a thleng tep a, kangmei chhuak vanga buai leh lo hâl meikhu zâm paw chuai maiin min hmuak mêk bawk. Natural forest-ah chuan mau aiin thing hi an to bit lo deuh zawk a, zung thui tak tak leh thûk tak tak an chhuah theih zâwk avangin tun ang hun boruak ro pawh an tuar nêp deuh niin a lang.
2. Kan sik leh sa, ruahtui tlâk hun, khaw lumzawng leh kan ramngaw neih zauzawng a danglam kum tin a, hun bi mumal chhiar a har telh telh a – khaw awmdan thu-ah. Tun ang hunah kan thlai kumhlunten chawrno nalh tak an chhuah hlei thei lo a nih chuan, leilung lamah fello nasa tak a awm thin tih a hriat theih thin a. Mizoram hmun tam bera tun ang huna buaina tlanglawn chu leilung ro lutuk a ni thin. Hemi chhâwk zângkhai tur hian huanah Fartuah (hling nei lo) phun thluah hi a tha pakhat. Thlai dîp lutuk lo turin a tuk-buk theih a. A hnah a hlai a, nisa-in leilung na taka a chhun tur a vêng. Thlasikah dài a man tâng hnem a, a hnuaiah tuihna a siam emaw tih mai turin a a huh-chiau zûk thin. Tuilâk tur nei lo tân chuan hlu tham tak tur a ni. Jan-Feb thla hian a hnah a tla-kawlh ve a, tun ang hun (March thla tantir) hian a rawn chawrbuk tan ve dawn chiah thung. March ral hma-in leilung khuh thamin a rawn buk leh hman a!
3. Kan sik leh sa lo danglam zel thlir hian, rah chhuah leh sum chang tur chauh ni lo, leilung tuamdam tur thlai tangkai dang kan chin tel a hun takzet tawh a. Leilunga thlai chaw kal kual (nutrient cycling) that zâwk nân te, natna leh eichhetu rannung tihtlêm nân pawh sum chang lo thilto kan mamawh tel hle a nih chu. Kan hmunhmate hi business farm ang chauh ni lo, nung leh nung lo tinrengte inpuihbawm tawnna (ecosystem) ang zâwnga kan thlir thiam a pawimawh tak zet ta! Thlai chi 2/1 chauh chin dul hi kan la tisual telh telh dawn. Thlaiin a mamawh leh tul ang buaipui tak tak turin Zopa facility neih hian a tlin lo fo thin. Chuvang chuan, Nature kan thawhpui thiam a hlu telh telh ang – khawvel sik leh sa lo danglam zelah hian.
4. Israel fate Pathianin Aigupta atanga hruai chhuak a, Nile lui kam phaizawl leitha lutuk kha a thlirpui lo tih a lang. A ramtiam lam chu Middle East, tuialhthei leh rangkachak engmah awm lohna, ram âwk êm êm leh leilung hausa lo ve tak kha a ni. Chu ram luah tur pawh chuan, thisen tam tak sêngin tharum leh skills a ngai takzet tih kan hmu. Mahsela, chutiang ramah pawh chuan tih-nuam tak leh thuawih taka an awm chuan, van malsawmna vûr a intiam a nih kha.
5. Kan Mizoram pawh hi a chuti lua lo, leilung hausakna chungchangah chuan. He ram, awih pang tam zawkna ngial hi engvanga Pathianin min pe nge a nih ngun taka kan ngaihtuah a tul. Kan society en ila, kan derdêpzia leh Pathian thu kan awih lohzia chu naupang tân pawh hai theih a ni lo. India rama State leiba ngah ber, chawmhlawm Kristian ram, khawvela inkhawm tam berte kan changkan theih mang miah lohna chhan leh leilung malsawmna kan rût ropui thei mang lo hi a CHHAN a awm ngei tur a ni. Pathianin min hmangaih kan ti thin. Chuti engahnge kan retheih êm êm rengt Pathian meuh pawisa lovin, sum leh pai leh nun nawmna kan zawng a, a man kan têl mêk zâwk niin a lang. Kan ram tân, kan hnam tân, kan thanharh a va hun tawh tak êm!