A him chinah Everton

Thawhtan zan khan English Premier League ah inkhel pathum a awm a. Table hnuai lama awm Everton chuan mak tak maiin Brighton an sawp a, regelation zone an chhuahsan. A him chin ah Everton an inhlankai laiin Notting-ham Forrest laka tlawm Southampton erawh chuan tlakhniam an hnaih lehzual sauh thung.
Inlehthalna lian
Chak mamawh tak chungah Amex Stadium a lenglut Everton hi season kal meka khel tha tak an nih vangin Toffees tan hneh harsa tura ngaih an nih vangin Mimualah hnehna chang tura rinkai an ni phak lo. A dinhmun chhiat belh tura tlawm tura ngaih ni mah se inlehthalna lian a thleng a, Everton hian 5-1 ngawtin hnehna an chang ta tlat.
Pa 7-na awm mekah Brighton lakah Everton hian duhthusama thain bul an tan a, inkhel tan atanga minute 1-na lekah Abdoulaye Doucouré chuan Calvert-Lewin siamsak atangin hmahruaina goal a thun nghal. Hma takah goal an thun vangin an phur hle a, goal dang an thun belh zawt zawt. Goal hmahruai thuntu Doucoure hian minute 29-naah McNeil siamsak atangin an goal hnihna a thun zui leh a, an hmahruaina a tizau.
An mualah goal hnih an chhuah zawn hnu lawkin Brighton an vanduai zui leh a, minute 35-naah Jason Steele chuan an lamah ti-goal in Toffees goal thumna a thunsak a. Si thum ngawt phur chungin chawlhlawk an hman a ngaih phah.
Chawlhlawk hnu lamah Everton an khel tha chhunzawm zel a, minute 76-naah Dwight McNei chuan an goal lina a thun. Si li an phurh hnu lawkah Brighton tan Alexis Mac Allister chuan goal thunin, minute 79-naah an si phurh a sut then. An si phurh sut then bawk mah se goal dang an thun belh thei lova, hun tawp dawn hnaih ah goal an chhuah belh leh ta zawk. Minute 90+6 ah Dwight McNei chuan Everton goal ngana thunin a tawp a khar a, Brighton lakah point thum hlutak an hmu zui ta a ni.
Brighton laka an chak nawlh vangin Everton hi 17-naah an inhlangkai a, point hnihin relegation zone an chhuahsan rih. Khelh thum khelh hmabak an la neihah Toffees hian him tumin thapui an thawh zui ang.
Brighton lakah Everton in hnehna lian an chan laiin inkhel dang, goal sarih zet luhnaah table mawng-phaha awm Southampton chu Nottingham Forrest lakah 4-3 in an tlawm a, Saints hi an dinhmun a chhe leh sual sauh a, tlahniam tluk an ni hial tawh.
16-naa awm mek Nottingham Forrest hian City Ground-a an mikhual, table mawngphah Southampton lakah bul an tan tha hle a, chawlhlawk hmain goal thum an thun hman. Minute 18-naah Taiwo Awoniyi chuan hmahruaina goal a thun a. Amah vek hian minute 21-naah an goal hnihna a thun zui leh nghal bawk. Si hnih an phurh hnu lawkah Southampton tan Carlos Alcaraz chuan goal thunin an si phurh a sut then zet a. Minute 44-naah Morgan Gibbs-White chuan mualneitu tan goal a thun zui leh.
Chawlhlawk hnu lamah Saints tan hian Danilo-a’n goal a thun belh leh a. Southampton tan Lyanco leh James Ward-Prowse ten goal thun bawk mah se Nottingham Forrest hneh lovin an tlawm zui ta tho a. Dinhmun chhe zual zawkah an intulut.