A hun a thlen hunah ka chhuak mai ang – Ronaldo

A hun a thlen hunah ka chhuak mai ang – Ronaldo
Euro 2024 kha major international tournament-a Cristiano Ronaldo goal khung zawh loh awmchhun niin, kha ti taka chhiaa Euro 2024 campaign a hman hnuah sawisel a tawk chho mawlh mawlh a, kum 39 mi lai a nih tawh bawk avangin Germany ram tournament zawh rual khan ram tana inkhelh a bansan ve tawh mai rinna a piang hman a, mahse, chawlh mai a la tum lo a, tunhnai Nations League game hniha Croatia leh Scotland khel tur Portugal squad-ah a la insawhnghet deuh deuh!
Portugal legend hian tun dinhmunah international football chawlhsan tumna a la neih loh thu tunhnaiah sawichhuakin, loh theih loha a chawlh hun a lo thleng ta a nih pawhin thutlukna harsa tak tur a nih thu a tarlang tel.
Ram tan game 212 khela goal 130 thun tling tawh Ronaldo hi men’s international football history-a khel hnem ber leh goal khung hnem ber a ni mek a, he record khum harsa tawh tak tur hi chawhchhiat harsa zual tura la belhchhah a duh niin a lang!
Manchester United leh Real Madrid legend hi tunah Saudi Arabia club Al-Nassr captain ni mekin, Europe lam chuangkai pha ta loin, a kum pawh lo tam ve ta deuh mah se national team chhuahsan lam reng reng a la hawo lo a, “A hun a lo thlen chuan ka che ve mai ang a, chu pawh chu thutlukna khirhkhan tak a ni ang.
“Ram tana thawh ve tur nei tawh loa ka inngaih hunah kei hi chhuak hmasaber tur ka ni ang,” tiin tunah rih chuan national team tan tangkaina la nei zel rihah a inngai a nih hmel!
Ballon d’Or chawimawi vawinga ngawt dawng tawh Ronaldo leh a team-mate kum 41 mi Pepe-te kha Euro 2024-a player upa ber ber an ni a; an tlak rualin Pepe chuan chawlh thu a puang mai a, Ronaldo pawh Germany ramah beisei a pha lo bawk nen ram tana inkhelh a bansan mai ang em tih zawhna a pian laiin national duty-a chhuah a la thlang ta rih a ni.
Portugal coach Roberto Martinez chuan Ronaldo hi player 25 awmna squad tharah telh lehin, Paris Saint-Germain striker Goncalo Ramos erawh kheimit hliam avangin a la chechhuak thei lo.
September ni 5 leh ni 8-a Lisbon khawpuia Croatia leh Scotland hmachhawn tur Portugal squad-ah hian Martinez chuan Sporting Lisbon winger rawlthar kum 17 mi Geovany Quenda pawh a senglut.
Chelsea left-back Renato Veiga leh Lille defender Tiago Santos-te pawh squad-a hmel thar kan hmuh dangte an ni.
Nations League hi kum hnih dana khelh mi (biennial international football competition) niin, Uefa member association hnuaia men’s national team-te inelna a ni.

Portugal squad

Goalkeepers: Diogo Costa (FC Porto), Jose Sa (Wolves/ENG), Rui Silva (Real Betis/ESP)

Defenders: Ruben Dias (Manchester City/ENG), Antonio Silva (Benfica), Renato Veiga (Chelsea/ENG), Goncalo Inacio (Sporting Lisbon), Tiago Santos (Lille/FRA), Diogo Dalot (Manchester United/ENG), Nuno Mendes (Paris Saint-Germain/FRA), Nelson Semedo (Wolverhamton Wanderers/ENG)

Midfielders: Joao Palhinha (Fulham/ENG), Joao Neves (Paris Saint-Germain/FRA), Vitinha (Paris Saint-Germain/FRA), Bruno Fernandes (Manchester United/ENG), Bernardo Silva (Manchester City/ENG), Ruben Neves (Al-Hilal/KSA)

Forwards: Joao Felix (Chelsea/ENG), Francisco Trincao (Sporting Lisbon), Pedro Goncalves (Sporting Lisbon), Rafael Leao (AC Milan/ITA), Geovany Quenda (Sporting Lisbon), Pedro Neto (Chelsea/ENG), Cristiano Ronaldo (Al Nassr/KSA), Diogo Jota (Liverpool/ENG)