A huna thawh zawh loh…
Sawrkar laipui programme pawimawh thila Mizorama lo zin DoNER minister chuan, North East Special Infrastructure Development Scheme sum cheng nuai 1959 hmanga Lengpui Airport tihchangtlun hna thawh mek chu a fang nghal a, kumin October ral hmaa thawk zo turin Mizoram sawrkar a hrilh nawn a. He hna hi zawh hun tur pawhsei niin, kumin December ni 4-a zawhfel tura tih a lo ni tawh a. Mahse, Union MoS-in kumin April 11-a helai hmun a tlawh tum khan kumin October-a zo tura hma lo la turin a lo hrilh tawh a; tun tumah hian October ral hmaa he hna hi zawh ngei nise tih a sawi nawn a.
Mizoram hmasawnna tur project hrang hrang, sawrkar laipui scheme sum hmuh hmanga hna thawhte hi a tlangpuiin Mizoram hian a hun taka thawh zawh hi a nei mang lo a tih theih awm e. State pachhe tak, mahni state sum bawm atanga hmasawnna hna thawhna tur sik chhuak ve thei hauh si lo hian, sawrkar laipui sum hmanga Mizoram hmasawnna hna thawhte hi a hun takah tal thawh zawh i tum ve ang u tih tak aruanga sawrkar laipui lamin an rawn nawr zawk ngaia kan awm thin hi a pawi hle a. Ram leh hnam hmangaihna rilru pu ren rawn chunga hna thawk hi kan ang lo thin hle a, hetiang hunah hian sawrkar hnathawkte pawimawhna a lo lang thin a, thahnemngaihna tak tak nena thawh a nih chuan, a hun taka thawh zawh lohna chhan tur hi a awm lo a tih theih ang.
Project thawh chungchangah hian Delhi sawrkar hian example tha tak an siam a. Kum 2021 khan Delhi khawpui chhunga flyover sak hna thawhnaah a hun taka thawh zawh chu sawi loh, project thawhna tur cost estimate aia tlem zawk fein hna tha tak tak an thawk a, vaibelchhe 303 senna turah vbch 250-in an zo thei a, vbch 422 senna turah vbch 297-in an zo thei bawk a. |ha takin hna thawkin a hun taka an zawh bakah mipui sum tam tak an la hum thei bawk. Chu chu ram leh hnam thatna tur duh tak takte thiltih a ni.
Kan state chhunga hmasawnna hna thawh reng reng hi han en ila, a hun tak pawh ni lovah, chhuanlam eng eng emaw siama thawh zawh ve hram hram hi a ni thin a. Ram ro (asset) tling tur ngawih ngawihte pawh thawh zawh lohva hlamzuih ral ta mai mai hi a tam em em bawk a. Sawrkar laipui sum hmanga hmasawnna hnate hi a nihna tur angin thawh ni thin se chuan, state dangin an entawn laih laih tur khawpa state hmasawn tha kan nih a rinawm tawh a ni.