A khelhpuite leh Maradona dahpawimawhtu Messi

A khelhpuite leh Maradona dahpawimawhtu Messi
Lionel Messi chuan Thawh-tannia footballer mimal chawi-mawina ropui leh ngaihhlut hlawh a tum riatna atana a dawn Ballon d’Or kha Argentina ram tana nikum World Cup-a a khelhpui zawng zawngte bakah an legend mual liam ta Diego Maradona tan a hlan tih a sawi.
France ram khawpui Paris-a Chatelet Theatre an tihah Inter Miami captain hian record siamin men’s Ballon d’Or dawng ngun ber nihna a chang a, a lawmman dawng lai hi a nupui fanaute’n a hmunah tawiawmin, lawmman semna dawhsanah a fapate pathum – Thiago, Mateo leh Ciro an dingchhuak ve nghe nghe.
Argentina captain Messi kuta world best player nihna hlan a nih chungchangah sawi neuh neuh awmin, nikum world cup-a a ram a champion-pui avangin dawng awm taka ngaitu an awm a, award semtute pawhin chu chu an tan chhan niin a lang.
Chutih laiin sawiseltute chuan hun reilote chhung awh tourna-ment-a chetthat ringawt chu he chawimawina dawnna’n hian tawk zo an ti lo a, season tluana Man-chester City tana goal khung mar pat, tournament pathuma a club champion-puitu leh UEFA player of the year lawmman pawh dawngtu Norway forward Erling Haaland thlan a ni lo chu mak ti pawl an thahnem hle bawk.
Kum 2021 hnu lama Ballon d’Or dawng leh ta Messi hi Argentina-in kum 36 chhunga a vawikhatna’na World Cup title an lak theihna kawngah player pawimawh chu a ni ngei a, nikum final-a champion lai France an hneh theihna kawnga an in-nghahna lian a ni a, mahse, Haa-land phu zawk titu an tam hle a ni.
Messi hian kum 2009 khan a tum khatna atan he award hi dawngin, kum 2012 thleng khan tum li a dawng zawn a; kumin August thla khan UEFA award semna lamah Haaland pha loin vote hmu tam pahnihna a ni.
Kum 23 mi Haaland hian season liamta khan inelna hrang hrangah belhkhawmin game 53 atangin goal 52 tehreng a tilut tling a, a club vawn lai City Champions League, Premier League leh FA Cup-ah a champion-pui vek a, chuti taka player chetha chu a career-a a vawikhatna atan Ballon d’Or dawng turin mite’n an tinzawn thup a, mahse, Messi a ngam ta lo a ni!
Argentine pawh hi mite rinkai ni thoin, Qatar rama Argentina-in mak tak taka hnehna an chan chhohna kawngah khan a meizang hlaptu niin, World Cup lawmman semnaah pawh khel tha ber chawi-mawina Golden Ball dawngin, goal sarih thuna assist vawithum neitu hian top scorer lawmman dawng zo loin Silver Boot a dawng thung a, Norwegian striker palian erawh a pianna ram fuh tawk loh avangin World Cup-ah hmuh tur a awm ve ta lo.
Arab ram tournament khelh hma zawng khan World Cup hi Messi major trophy lak loh awmchhun a ni reng a; kum 2014 final-ah Germany hneh loin an tlawm a, ram tana inkhelhte a han bansan hman ren rawn a, ramin a mamawhna chhang tur leh a mission la hlenchhuak loh zo fel turin Argentina squad-ah a kirleh a, kumin March thla khan football history-a international goal 100 thun tling thei pathumna a ni.
Messi hian club lamah Inter Miami a pan hmain Paris St Germain chu Ligue 1 title a lakpui a; Inter a zawm hnuah Major League Soccer club chu Leagues Cup-ah a champion-pui a, an club chanchina an trophy lian lak hmasaber a ni nghe nghe.
Kum 36-a upa ni tawh Messi hian kum 2017 hnu lama he chawimawina la dawng leh ta lo Cristiano Ronaldo aiin pathumin Ballon d’Or a dawng tam ta a; top three-a lang ngunber ni bawkin, tum 14 ngawt top three dinhmun luahin, vawinga chu award dawng zo loin runner-up dinhmun a luah.
Chutiang mi chuan tuntuma a award dawn hi a ma mimal theihna ani lo tih sawiin, ram tana a khelhpuite puihna lo chuan dawn mi rual a nih loh thu a sawi a, chuvang tak chuan a trophy dawn pawh a team-mate zawng zawng tan bakah Maradona tan a hlan tih a sawi.
Men’s Ballon d’Or sem tum hian chanchinbumite’n kum 2026 World Cup khelh leh a inbeisei em tih an zawt a, Messi chuan: “Chumi chungchang chu ka la ngaihtuah lo. Nitin hian ka career kal lai hi nuam ti takin ka la chhun-zawm phawt a; tun dinhmuna ka hma-chhawp hmasaber ni rih tur chu nakkuma United States-a khelh tur Copa America hi niin, World Cup chu ka la ngaihtuah rih lo,” a ti.