A khualchhawng lam faina

Clean Aizawl City chu Dinthar Veng huamchhung atanga Ebenezer damdawi in leh MINECO panna kawngkam tifaiin an hnatlang a, bawlhhlawh bag 20 chuang an chhar a. Bawlhhlawh zingah hian zu leh ruihhlo khawihna hnuhma a tam hle tih an sawi a.
Mizoram tlawha lo zin tourist thenkhatin Mizoram hmun hrang hrang an fanna video youtube-ah an dah thin a. Chuta an sawi lansarh pawl chu, khawpui chhung kawngpui dung a fai thu leh, motor horn ri bencgchheng a awm ve loh thu a ni thin.
Hetih lai hian, a ram leilung fate chuan ni tin kan khawsakna hmun a nih miau avangin, mikhualten an hmuh ve phak loha bawlhhlawh kan chhehrelh dan kan hria a, pawl hrang hrang kan hnatlang luih luih reng a, bawlhhlawhah pawh ruihhlo khawihna hnuhma leh, hnuhma tawp tak tak hai chhuah tur a awm reng a. Chumi awmzia chu, ‘a khualchhawng lam chu kan fai ve vûk’ tihna a ni ber awm e.
Kawng kam biru lai, tuiluankawr leh kawmkar bakah kawr ruam hrang hranga bawlhhlawh inchhep vum hner hnur thinte hi ruihhlo tih chingte hnuhma erawh a ni vek bik lo tih a chiang a. Chuti a nih chuan, a khualchhawng lam faina kan ngaih pawimawh ang hian lang lo ruamah pawh faina tak tak hi kan ngai pawimawh tehchiam lo tihna a ni a, kan farisai (a langa lan mawi tumna) viau tihna ni maw.
Faina lama hmalaknaah hian, ruihhlo do anga han inveh chiam chiam a rem ve lo te pawh a ni ang a; rui lo hai lo, harh fim kar chunga mi hmuh loh lai chuha bawlhhlawh paih lohna tur hmun a ni tih hre reng chunga a ruka paih duh tlatte chu han inven sen chi pawh a ni lo ang a. Kan tih theih nia lang ta chu, awareness campaign nei reng chunga hnatlan tlut tluat hi ni ta berin a lang.
Tih theih kan neih pakhat chu, ruihhlo do ang deuha hma lak a, khawtlang tin ten veng chhunga bawlhhlawh thehthang dan thlithlaitu ‘task force’ din theuh a, ngawrh taka kum khat chhung vel duty thin hi niin a lang. Chutianga beihpui kan thlak theih phawt chuan, mipui mimir pawhin zawi zawiin kalphung tha zawk hi kan pawchhuak thei maiin a rinawm. Hetiang kher lo pawh hian, eng tin emawa hmalakna ngaihtuah hi chu tihmakmawh niin a lang. Engmah ti zui lova hnatlan tlut tlut ringawt hian ram ropui min thlen thei lo chu a ni ber tawh e.