A kir hun thlirtu Alcaraz

A kir hun thlirtu Alcaraz
La Caja Magica hmuna April ni 22 atanga May ni 4 chhung awh tur ATP, Outdoor, Clay tournament Madrid Open kal mek khel thei loa inhliam Carlos Alcaraz chuan French Open inbuatsiahna atan May ni 6 atanga Rome khawpuia khelh tan tur Italian Open chu a kirlehna hun leh hmun atan a tinzawn.
Claycourt grand slam tournament French Open hi tunthla May ni 25 atanga Paris khawpuia khelh tan tur a ni.
French Open leh Wimbledon champion lai ni kawp Alcaraz hian Pathianni Barcelona Open final set hnihnaah khan a kaihza tha leh a thal bawr a tina a, Madrid Open lamah inlan thei ta lo mah se French Open title a kawl lai humhim tura a fit hman a beisei tih a sawi.
World No. 3 hi final-a a khingpui Denmark player Holger Rune lakah khan 7-6 (8-6) 6-2-in a tlawm ta zawk a ni.
Kum 21 mi chuan Barcelona Open final-a a tlawm hnu khan chawlhkar khat emaw a kar hnihna lamah emaw chuan training chhunzawm leh hman a inbeisei thu sawiin, Madrid Open khel lo tura inhnuhdawh mai chu a tan thutlukna dik ber nia a ngaih thu a sawi a, French Open khel tura a inpeih hman a beisei thu a tarlang tel.
Spaniard hian Roland Garros tournament khelh tan hmaa competitive match a khel hman ta lo a nih pawhin clay-court Grand Slam title a kawl lai humhim tura a inpeih chhuah hman a beisei tho thu sawiin, “Tunhnai chawlhkar liamta chhoa ka tennis khelh dan a ropui a, tuna ka hliam hian ka inrintawkna a hliahbo zo lo.
“|ha taka inkhel leh thei turin rilru lamah ka chak tawkin ka hria a, Rome-ah ka la inkhel thei lo emaw Roland Garros hmain tournament-ah ka chhuak thei lo hrim hrim emaw pawh ni se chu chuan min tibuai lo ang.
“Ka chim chin hi ka hrechiang a, tennis tha mi khel chhuak tura tih dan ka hre tawh a ni,” tiin a inrintawk zui zel thu a sawichhuak tel bawk.