A lerah Barca an kir

A lerah Barca an kir
Inrinni zanah hmahruaitu ni chungin Osasuna khelmualah Real Madrid an tlawm a, Pathianni zanah chaka table ler luahkir leh thei an ni tih inhre chungin Barcelona-in Spotify Camp Nou-ah Levante an mikhual a, 3-0 hnehna nen Spanish La Liga table-a an hmahruaina hloh tawh an neikir leh ta a ni.
Barca goal hmahruai hi tan atanga minute lina leka Eric Garcia siamsak atanga rawlthar kum 18 leka upa midfielder Marc Bernal tihluh niin, minute 32-ah Frenkie de Jong chuan Joao Cancelo chhawpsak atangin mualneitu team goal hnihna a thawh ve leh a, kha kha thla 13 chhunga a club vawn lai tana a goal hmasaber niin, half time-ah Catalan team hian si hnih faiin hma an hruai phawt.
Barcelona goal thumna erawh a fan ta deuh a, minute 81-naa Lamine Yamal thawhrah atanga Fermín Lopez-a thun niin, season kal laia a goal 11 tihluhna a ni ta.
Game hnih an tlawm zawn hnuah Catalan team-in hnehna boruak an tem ve leh ta a, La Liga table lerah an chuangkai zui leh ta bawk.
Hansi Flick-a team hian Levante an mikhual tumin 100 per cent home record chak an vawng nung zui zel a, Nou Camp bika Levante an hmachhawn tawh tum 18-ah an la chak fai vek!
Barca hi Girona mualah tlawmin, Copa del Rey lamah Atletico Madrid chuan 4-0-in an sawp bawk a, chuti ang hun thim takin a bawh mek laiin an hneh than Levante lakah chak boruak an tem leh ta a, title race-ah pawh a khalhtuah an tang zui leh ta a ni.
Flick chuan hma an hruaikir leh ta chu lawmawm teh mah se ngaih ti tha ngawt tur an la nih loh thu leh title inchuhnaah kawng thui tak zawh tur a la awm thu Marca-in an kawmnaah sawiin, han chesual nawn at at mah se chhanna tha tak an pai zel chu a lawmna leh a team chunga a hmuh duh tak a nih thu a tarlang tel.