A lerah bawk Girona kirleh!

Kumin Spanish Primera Liga chu a mak angreng, club tenau Girona leh khawvel football palian Real Madrid an inlehthal chho zak zak reng mai a, ThawhTanni zana an mikhual Alaves laka 3-0 hnehna sualchhuak chungin Girona hian La Liga table-ah Spanish giants hmakhalhin hma an hruaikir leh tawh nia!
Kartir Spanish top flight inkhel awmchhunah hian Artem Dovbyk chuan mualneitu team tan goal hnih thawhin, a hmasa zawk hi first half minute 23-a a tihluh a ni a, second half tir lamah penalty aTangin a goal hnihna a puitlin a, season kal laiah La Liga goal 10 khawl tling ve ta hialin, ani aia league goal khung hnem awmchhun chu goal 13 nei tawh Real Madrid midfielder Jude Bellingham chiah a ni.
Dovbyk-a goal hmasa zawk hi Yan Couto shot hrinchhuah tiin a sawi theih ang a, Alaves keeper Antonio Sivera Yan chuan Couto chhuih hi lo dang thei mah se Dovbyk-a chhunzawmna erawh a do zo ta lo a ni!
Dovbyk goal hnih thun inkarah hian chawlhlawk dawnah Portugues Manzanera tlazepin, tah pawh hian Couto bawk inrawlh lehin, a ball siamchhuah aTangin Portu an tih bawk hian home team goal hnihna a thawh.
Girona goal thumnaah pawh Manchester City loanee Couto bawk langsar lehin, a penalty hlawhchhuah chu Ukraine striker Dovbyk chuan Alaves goal-ah a chhuihlut a, tarlan tak angin, season kal laiah La Liga goal 10 lai a puitlin ta a ni.
Kumin nipui insuan hun laia Dnipro aTanga pound maktaduai 6-a Dovbyk an leichhuahna man kha Girona club record signing nia ngaih a ni.
Boss Michel-a enkawl Girona neitu pakhat hi City Football Group niin, he pawlah hian Manchester City pawh an tel nghe nghe a; ThawhTannia zana an chak leh tak hnu hian league khelh 17-ah point 44 hmuin an hmahruaina an changlet a, pahnihnaa chhuk leh ta rih Real Madrid lakah point hniha sangin, season laihawl emaw a tawp lamah emaw hian tawnhriat an ngah tawk loh tuarin an tlahniam dawn em kan thlir ang.
Catalan club zingah Barcelona an lar ber a, a dawtah chuan Girona hi an rawn ni chho ta hluai a, point 35 hum chunga pathumna Thut mek Xavi Hernandez-a team lakah hian point kua ngawtin an sang tawh.
He Girona team hian an club chanchin-ah trophy lian an la sualchhuak lo a, tun season hi engtin tak hmangliam ang maw tih hi Spanish football tuipuitute ngaihven a ni mek.
Naktuk zan hian Real Betis an luhkhung zui leh dawn a, an chak leh a nih chuan season laihawl krismas lai thlengin hma an hruai zui thei dawn!