A lerah Real Madrid an insawh nghet

Spanish Primera Liga hmahruaitu Real Madrid chuan Pathianni zanah sili faia mikhual Celta Vigo sawp chungin La Liga table-a an hmahruaina an sawhnghet zual zel.
Hremna avanga inkhel thei lo Jude Bellingham awm loh hriat miah loha an kawtkai luahlum thei Spanish giants goal hmahruai hi minute 21-a Vinícius Junior tihluh niin, hei bak hi chawlhlawk hmain goal dang an khung belh zo ta bik lo.
Second half-ah pawh chuti maiin goal-ah an chefuh chhunzawm thei chuang lo a, minute 80 an khel tling dawn chiah tihah Celta keeper Vicente Guaita chesualin ‘own goal’ a tilut a; hun pangngai tawp hma minute hnih la awmah Celta Vigo defender Carlos Dominguez chuan an lam goal-ah Vinicius-a cross a tilut palh ve leh.
Real goal lina ni zui ta hi hun pekbelh minute lina a kal mek laia Turkish rawlthar Arda Guler tihluh niin, a club vawn lai tana a goal khatna a ni zui ta nghe nghe.
Rafael Benitez-a team laka point thum an hmuhchhuah leh tak hnuah Real Madrid chuan La Liga title an hnaih leh kuar a; ti hian, khelh 28-ah point 69 hum tling tawhin, Inrinnia Osasuna laka 2-0 hnehna chang Girona nena an inthlauhna chu point sarihah bawk an dahkir leh ta a ni.
Celta erawh chuan point 24 nen standing-ah 17-na an luah chhunzawm a, relegation zone an la rap lo chhunzawm hram hram zel!
Kartawp inkhel dangah title race-a Real tana venthawn la ngai ve tlat lo thei lo pahnih Girona leh an hnuai chiaha pathumna luahtu Barcelona an chak a, Madrid tan tlakhniam hlau tankhawh Celta laka point hloh then a rem bik lo ang!
Los Blancos khan karliamta Nilaini zanah RB Leipzig paltlangin Champions League quarter-final an lut fel a, ninga lek chhunga Bernabeu khelmuala vawihnih chak thei team hian trophy lian pahnih beisei tur an la nei chhunzawm zel.