‘A Minecraft Movie’ record siamin box office-ah a No.1

‘A Minecraft Movie’ record siamin box office-ah a No.1
Warner Bros. film, naupang en atana pawh a him chi “A Minecraft Movie’ chuan tun weekend kalta North America-ah cinema hall ticket hralhna atangin dollar maktaduai 157 la lutin, box office No.1 a ni. He film hian US pawnah dollar maktaduai 144 la lut bawkin, opening weekend-a a lak luh zawng zawng chu dollar maktaduai 301 a tling. He film hi dollar maktaduai 150 vel senga siam a ni.
Video game behchhana film an siam hi beisei aia a let tam takin a che tha a, video game behchhana film siam tawh zawng zawngah opening weekend-a sum la lut hnem ber a la ni a, a hmaa hetiang record siamtu chu ‘The Super Mario Bros. Movie’ niin, 2023 khan opening weekend-ah US-ah dollar maktaduai 146.4 a la lut thei.
‘Minecraft’-ah hian Hollywood milar rual inlanin, Jason Momoa, Jack Black, Jennifer Coolidge, Danielle Brooks, Emma Myers leh Sebastian Eugene Hansen te an chang a, a video game pawh hi khawvel huapin copy maktaduai 300 chuang an hralh thei a, tunah hian active monthly player maktaduai 174 an tling thei bawk.
‘A Working Man’-in dollar maktaduai 7.3 la lut lehin No.2 a ni a, he film hian ni 10 chhungn US-ah dollar maktaduai 27.8 a la lut tling ta a, ‘The Chosen: Last Supper’-in dollar maktaduai 7.2 la lutin, No.3 a ni bawk.
‘Snow White’ pawhin a weekend vawi thumnaah dollar maktaduai 6.1 la lut lehin No.4 a la ni a, he film hian kar thum chhungin US-ah dollar maktaduai 168.4 a la lut tling ve ta bawk.
Box office top 10:
1 A Minecraft Movie $157,000,000
2 A Working Man $7,276,905
3 The Chosen: Last Supper — Part 2 $6,701,939
4 Disney’s Snow White $6,087,000
5 The Woman in the Yard $4,500,000
6 Death of a Unicorn $2,696,929
7 The Chosen: Last Supper — Part 1 $1,868,870
8 Hell of a Summer $1,750,000
9 The Friend $1,617,415
10 Captain America: Brave New World $1,393,000