A pa tel loa no pai stingray-in ngaihven a hlawh

A pa tel loa no pai stingray-in ngaihven a hlawh
Stingray nu, a hminga Charlotte an tih chuan an dahna, sangha khawina (aquarium)-ah a stingray pa tel miah loin kum riat chhung a awm tawh a, chuti chung chuan no a pai ta tlat mai a, ngaihven a hlawh ta hle a ni. Stingray te hi sangha zingah chuan a tui lova, no pai chi an ni.
Charlotte hi kum 12-16 vela upa niin an chhut a, tunah hian no pali vel a pai niin an hria a, an khawina bawmah hian Charlotte chauh hi stingray awm chhun a ni. Hendersonville-a Team ECCO Aquarium & Shark Lab chuan ultrasound hmanga an endik hnuah Charlotte hian no a pai ngei tih hi an nemnghet tawh a, “Kan stingray, Charlotte hian no a pai e. A makna chu stingray pa kan nei miah si lo hi a ni,” an ti.
An khawina bawmah hian Charlotte chiah hi stingray awm chhun a ni a, sangha dang pahnih, bamboo shark, Moe leh Larry an tih te chu a tankmate an ni a, Moe leh Larry te hi a pa ve ve an ni thung a, chuvangin stingray leh bamboo shark te hi an inthlahpawlh ta mai em ni ang tih te thlengin an ngaihven ta a ni.
Hetihrualhian Aquarium & Shark Lab-a research scientist Dr. Kady Lyons chuan, “Shark-ray (shark leh stingray inthlahpawlh) lampang chu a ni thei lo. Charlotte hian parthenogenisis paltlangin no a pai ta niin a lang,” a ti. Parthenogenesis chu asexual reproduction ang deuh niin, chi (sperm) tel lova embryo lo insiam a ni mai awm e.
Lyon chuan, “Hei hi thil mak lutukah pawh ka ngai lo, a chhan chu siamtuin a kawng a hawn sak a ni mai. Engvanga hei hi lo thleng nge tih chu kan hre lo,” a ti bawk.