A pasal tur duh loh vangin a chhungte hrai hlum

Pakistan hmeichhe pakhat chuan a pasal tura a chhungte hmuhsak a duh loh avangin a nu leh pate telin, mi 13 a hrai hlum.
He thil thlenna hmun hi Sindh province niin, pathianni khan he pawikhawihtu hi police te chuan an man nghal a, a thurualpui a bialpa ni lai pawh thu zawhfiah tura an kawl thu an sawi.
Tleirawl hian an chaw ei turah tur phulin, an pasal tura an huallawkte nen hun hlimawm tak an hman hnu lawka thleng a ni.
Senior police officer Inayat Shah chuan, heng mi 13 te hian chaw an ei zawhah nasa takin an pum a na zui a, damdawiinah hruai nghal nimahse, chhan theih an ni ta lo. Post-mortem result atang chuan tur chak taka hrai hlum ngei tih a chiang hle, a ti.
Shah sawi danin, he pawikhawihtu hi thu an zawhfiahna atanga a lan danin, a chhungte lakah hian a thinrim hle a, bialpa nghet leh duh tak a lo neih avangin a chhungten amah rawn lova a pasal tur midang an lo hualsak mai chu lungawi thei lovin hetiang thil hi a ti ta mai, niin a sawi.
A hming leh nihna erawh thuthar thehdarhtute hmaah chuan la thupsakin, a bialpa pawh thu zawhfiah tura an kawl rih mek thu Shah chuan a sawi bawk.