A taka tih theih loh tur zuarin mipui bumna ang intiam lo ang – MKHC

Mizorama MLA inthlanpui neih turah political party-te chu a taka an tih theih loh tur zuara mipui bumna ang chi intiam lo turin an chah tih kohhran hrang hrang aiawhte chuan an sawi.Mizoram Kohhran Hruaitute Committee (MKHC) chuan November 7-a MLA thlan turah thuchah a siam a. Sawrkar tha leh nghet neih theih nan inthlan thuchah hi kohhran mipui leh political party zawng zawngin ngaipawimawha zawm turin a ngen tih a sawi.
Political party-ten a taka tih theih loh tur zuara mipui bumna ang thil intiam lo tura chahin, candidate-te hmalakna tura pawl bik emaw hnam bik emaw mi tlemte te hamthatna tur emawa intiamtir lo turin a chah.
‘Mi tumahin sum leh therhlo hmanga min lei tumtute lakah kan vote (zalenna) hralh loh nise, hetianga tih tumtute hnawl ngam tura tan lak nise; political party tin leh candidate tin ten tharum thawhna chawktho thei zawnga tawngkam uchuak tak leh inelsen zawnga midang sawichhiat loh nise, chutiang lam hawi reng reng chu social media-ah pawh vawrh darh loh nise,’ a ti.
Thianghlim leh zalen taka mitinin mahni duhzawng an thlan theih nan, political party-ten hel pawl rawih emaw invau leh ralthuam lam chi hmang loa; candidate-ten inthlan dawna vote leinaa ngaih theih sum leh thildang sem emaw pek emaw ti loa; kohhran leh khawtlang inpumkhatna leh inunauna tichhe thei – hnambil emaw pawl emaw tana political party leh candidate-ten hma la lo turin a chah.
Political party leh candidate-ten intihphurna atana ruai theh leh sum seng hnem zawnga hma la lo tur te; Kristian ram kan nih angin zawlnei der leh zawlthupuan hnawl nachang hre tur leh party-ten hetiang thupuan ang chi hmanrua atan hmang lo turin a ngen.
Vote nei zawng zawngin kan mawhphurhna a nih anga vote thlak vek turin a ngen a. ‘Sawrkarna siamtu apiang chu kan ram tana Pathian ruat an ni tih mipuiin kan hriat a, sawiselna tur ringawt ngaihtuah loa ram leh hnam tan dik taka hna an thawh theih nana tawiawm hi kan bat a ni tih hrereng ang u,’ MKHC hian a ti.
Candidate chungchangah ram hruaitu tha kan neih theih nan political party hruaituten fimkhur leh uluk taka candidate thlang turin a beisei tih sawiin, Pathian tih mi, mi hmingtha leh rinawm; ruihtheihthila fihlim; hlepna bawlhhlawh leh thamna duh lo; mipat hmeichhiatna kawnga hminghliau lo leh mahni awmna kohhran, sakhua leh pawla mi rinawm nise an duh tih MKHC hian a sawi a ni.