A team-mate thenkhatin
Thubuai awrh laiin Mendy kha sum an puktir!
Pawngsual leh hursualna lama inhnamhnawiha puhna case rit tak a awrh lai khan Manchester City defender Benjamin Mendy kha club lamin hlawh an pe lo a, sum lamah pawh a talbuai bat bat a, dinhmun khirh taka a din lai khan City tana a khelhpui thin Raheem Sterling, Bernardo Silva leh Riyad Mahrez-te’n lainat takin sum an puktir tih court witness statement-a a sawichhuak.
Nikum July thlaa Chester Crown Court lama inlan zak zak Mendy hian kum 2017 khan Monaco atangin City a zawm a; August 2021 khan buaina lian takin a tlakbuak zui ta tlat a; thubuai a awrh hnu November 2020-a an man vawikhatna hnu thleng khan City chuan hlawh an la pe a, mahse, a hnu lam zelah chuan thu a tam a, Football Association lamin an ‘suspend’ zui ve leh tak hnu phei chuan club lama a contract kal lai anga thil a kal zel a lo rem lo a, France defender hian a hlawh tur an hrensak kha pound maktaduai 11.5 a tling hial niin witness statement-a sawi.
Pawngsual thubuai hrang hrang leh pawngsual tuma puhna a tawhte lak atangin nikum khan kum 30-a upa Mendy hi a fihlim ta hram a ni.
Court document-a chhinchhiah a nih danin Mendy hian court hnenah chuan club lamin a hlawh an hrensak hnu khan legal fee leh bill hrang hrang bakah child support payment an tih lama pawisa a chawi a ngaih avangin a sum khawlsa a zo thuai tih a hrilh a, a statement-a a inziah danin, “Raheem Sterling, Bernardo Silva leh Riyad Mahrez-te’n ka legal fee chawi tur bakah ka chhungte ka enkawlna tur sum min puktir,” a ti.
Kum 2022 November thla khan Mendy hian September 2020 atanga July 2024 chhunga City Chief Football Operations’ Officer Omar Berrada hnenah Whatsapp message thawnin a hlawh an pek hun tur a zawt a, chhanna a dawng lo.
Court hearing laia thute pawh sawi ve Mendy agent Meissa N’Diaye pawhin kum 2021 September ni 20 khan hlawh chungchangah Berrada a bia tih sawiin, Benjamin-a hlawh an hrensak chu ‘trial’ zawh huna pekchhuah a nih tur thuin a lo chhang thung niin a sawi.
Tuna Manchester United chief executive ni ta Berrada hi chuan ‘hearing’ laia hlawh pekchhuah hun zawhna a dawn lai khan an pek theih hun turah tiam engmah a neih loh thu a sawi.
January 2022-a bail kaltlanga chhuah a nih hma khan Mendy hi thla nga chhung lung inah a tang a; August 2022 khan a case awrh chungchang ngaihtuah tan a ni.
January 2023 a herchhuah chuan pawngsuala puhna paruk leh hursualna lam hawia inhnamhnawiha puhna dang pakhatah thiam chantir ni mah se July 2023 khan case thenkhat ngaihtuahnawn leh a ni a, tah pawh chuan hmeichhe pakhat pawngsuala puhna leh midang pakhat pawngsual tuma puhnaah a fihlim zui leh ta a ni.
Tarlan tak angin, Mendy hi City khan pound maktaduai 52-in an senglut a, kum 2018, 2019 leh 2021-ah Premier League title a lakpui a; kum 2021 August ni 15 kha Manchester City tana Premier League match a khelh hnuhnunber a ni.
June 2023-a a contract a tawp rual khan England atanga inpuchhuakin French club Lorient tan tun thlengin a la khel mek a ni.
A team-mate thenkhatin Thubuai awrh laiin Mendy kha sum an puktir!
Get real time updates directly on you device, subscribe now.