A thalaite lakah China mangang

Khawvela mihring tam ber chenna China chuan ei leh bara tlukchhiatna lian tak a hmachhawn thei reng niin an inngai a, an nakin huna ram hruai hna thawktu tur an thalaite chungah an mangang lawk hle niin sawi a ni.
China hruaitu lu Xi Jinping chuan kar hmasa khan an ram ei leh bar dinhmun leh an hmasawn dan hrang hrang chungchang a enkual thu sawiin, tun ang renga an kal a nih chuan a lehpeka chhuanthar lo la awm turte chu retheihna khurah an tla lut thei mai dawn niin a sawi.
China hian kawng tam takah intodelhin, ei leh bar dinhmunah phei chuan khawvelah US ai pawha lian zawka inchhal chang an nei hial a, heti a ni chung hian an thalaite chuan heti lam hawi hi ngaihtuah lovin, social media an lawm bakah hnathawh mumal nei lo an tam phah tawh hle tih tarlan a ni.
Xi hian China mipuite chu thangharh turin a duh a, ei leh bar a ni emaw, thil siamchhuah lam a ni emaw, khawvel sik leh sa mila inher danglam thlenga chhut a, ngaihtuahna hmang thiam turin a duh a, chhuantharte tana ram duhawm leh lian zawk a nih zel theih nana tan la turin an thalaite chu a chah bawk. Tunlai thiamna hmang tam a, a tha chin senglut thiam zel tur leh hun khawhral nan mai maia thiamna sang zawk hmang lo turin a duh bawk.