A thiam pali zingah Sabalenka leh Navarro

US Open women’s singles quarter-final match an khelhah hnehna chang ve vein Aryna Sabalenka leh Emma Navarro-te’n tun Thawhlehni khan Flushing Meadows, New York-ah semi-final an lut a, final luh inchuhin an intum zui nghal ang.
Belarus chhuanvawr Sabalenka hian Paris Olympic champion Qinwen Zheng lakah hnehna nuamsa (6-1, 6-2) changin, tun hi a zawna tum li ngawt US Open last four a luhna a nih bakah a career-a major semi-final vawikua a thlenna a ni tawh.
Kum 26-a upa Sabalenka hi kum 2002 (Venus Williams) hnu lama US Open semi-final tum li lut zawn thei naupangber a ni nghal.
World number two Sabalenka hian kumin kumtir lam khan Australian Open title vawihnih a lakna kawngah Chinese seventh seed Zheng hi a lo hneh tawh a, Arthur Ashe Stadium-a an intum nawn leh tum pawh hian a ‘trademark mighty forehand’ an tih mai, a forehand pui tak hmang bawkin seventh seed lakah inkhel a thunun leh a ni.
Olympic title kawltu fakin Sabalenka chuan Zheng chu player hmachhawn hautak a nih thu a sawi.
A tum leh tur American 13th seed Navarro lakah hard-hitting Sabalenka hi kumin Roland Garros fourth round-ah khan a lo chak tawh a, US Open inbuatsaihna Indian Wells hard court-ah erawh tualchhung player ngam loin Belarusian a tlawm thung a, New York major tournament semi-final match-a an intum hunah hian tunge chak zawk dawn tih sawilawk harsa tak a ni ang.
Sabalenka pawh hian a tum leh tur hi player ropui a nih thu a pha lo a, tun tournament kal laia a inkhel a hmuh tawh chinah ngawt pawh tennis ropui khel chhuak thei a nih thu sawiin, an inhmachhawn leh tur chu inbeihna ropui a nih tur thu a tarlang tel.
Navarro hian quarter-final inkhel dangah Thawhlehni vek khan 6-2, 7-5-in Spain nula Paula Badosa a hneh a, a vawikhatna atan Grand Slam semi-final a khel dawn.
New York khuaa piang leh seilian Navarro hian round hmasa lamah defending champion Coco Gauff a lo hneh tawh a, rinkai zawk Badosa lakah minute 72 chhungin a chak zui leh ta a ni.