A thih hnuah SHOF-ah Prince an la lut
Prince chu a thih hnua Songwriters Hall of Fame-ah lak luh a ni a, Target Center, Minneapolis-a a film Purple Rain 40t anniversary screening neihnaa SHOF-ah hian lak luh a ni. Kuminah hian SHOF hian songwriter ropui pahnih an thih hnua an lak luhna a ni ta a, April thla khan Cindy Walker chu a thih hnuah SHOF-ah hian an seng lut tawh bawk.
Prince chawimawina hi a farnu leh a damlai pawha a lo thawhpui tawh thin Sharon L. Nelson-i’n a dawn sak a, Sharon chuan, “A hlate hi kan hre reng tawh ang. Hlaphuahthiam ropui tia hriat nih aia award duh zawk hi a nei chuang lo,” a ti.
Prince hi a damlai pawhin 2013 khan SHOF-ah hian lak luh tura thlan a lo ni tawh a, mahse, SHOF policy-ah songwriter chu an dam a nih chuan induction ceremony-ah anmahni ngei an tel a ngai a, Prince hi a tel remchan theih loh avangin an la lut ta lo a ni.
SHOF president leh CEO ni bawk Linda Moran chuan Prince hi SHOF a lak luh tumin hun remchang an zawng zui ta zel ni a sawiin, 2013-ah an lak luh tak loh hnuah Prince ian 2015 kum tawp lamah be pawpin, he award hi atan a pawimawh thu te sawiin SHOF a lak luh nih ngei a duh thu a sawi a, June 2016 ceremony-ah an la lut dawn tih puang lovin, surprise event anga lak luh turin an tifel ta a, mahse, April 2016-ah Prince hian chatuan ram a pan ta si niin a sawi a, “Tunah khawvela songwriter ropui danglam berte zinga mi Songwriters Hall of Fame member a ni ta hi a lawmawm a ni,” a ti bawk.
Prince, a hming tak Prince Rogers Nelson hi singer, songwriter, musician leh producer a ni a, a catalog-a hla zawng zawng pawh ama phuah vek a ni a, Billboard Hot 100 chart top 10 a lang thei hla 19 a nei a, chung zinga hla panga chu No.1 a kai nghe nghe.
Prince hian artist dang Seena Easton, Kenny Rogers, Madonna, Stevie Nicks, Patti LaBelle, Celine Dion, Kate Bush leh Bangles hla sak tur te pawh a lo phuah sak tawh a, a hla sak thenkhat chu Chaka Khan, Tom Jones, Sinead O’Connor, Alicia Keys, Pointer Sisters leh Cyndi Lauper te pawhin an cover taw bawk.
Prince hian ‘Purple Rain’ avang ian Oscar leh Grammy a dawng ve ve a, 1984 khan ‘I Feel for You’ hla Khan tana a phuah avangin Grammy best R&B song a dawng a, Sinead O’Connor hla hit ‘Nothing Compares 2 U’ la a phuah avangin 1990 khan Grammy song of the year-ah nominate a ni tawh bawk.