A thlawna thisen pek a pung zel
Sawrkar kum liamta, 2024- 2025 chhung khan Mizoramah a thlawna thisen pek percentage chu zaah 93.71 a ni a. Voluntary donation hi Association for Voluntary Blood Donation (AVBD) Mizoram-in a biruk lawk zaa 92 aiin a sang zawk.
Mizoram puma thisen pek dinhmun chhinchhiahtu Blood Transfusion Service, Mizoram State AIDS Control Society (MSACS) tarlan danin, 2024 April 1 atanga 2025 March 31 chhung khan Mizorama blood centre 11-ah thisen unit 34752 pek a ni a, chu’ng zinga unit 32566 chu pek bik nei loa a thlawna pek (voluntary) niin, voluntary donation hi zaa 93.71 a tling.
Kum 2024- 2025 chhung hian blood centre hrang hrangin blood donation camp vawi 611 an buatsaih a, chu’ngah chuan thisen unit 22602 pek a ni.
AVBD Mizoram chuan 2024- 2025 chhunga voluntary blood donation percentage zat thlen tum (target) a siam a, chu chu zaa 92 a ni. An target tihhlawhtlin ngei tumin blood centre hrang hrang nen theihtawp chhuah a ni a, Mizoram mipui, a bikin thalaiten theihtawp an chhuah tih a sawi.
‘Sawrkar hotute leh Mizoram mipui tanrualna avangin voluntary blood donation-a target siam kan khum thei hi lawmawm kan ti a. Target khum a nih theih chhan, thisen petu zawng zawng leh Mizoram mipui chungah kan lawm takzet a ni,’ a ti.
Tun April thla hi Good Friday thla a ni a, AVBD chuan Good Friday puala thisen pe turin Mizoram thalai a ngen. ‘Chhandamtu Isua Krista kraws-a khenbeh a ni a, kan tana thisen chhuaka a tawrhna hrerengin, midang kan chhanhim ve theihnan Good Friday puala thisen pek hi a inhmeh em em a, thisen pe turin thalaite kan ngen a ni,’ a ti.
Mizorama thisen mamawhna a san zel avangin thisen pek chu tawpsan mai theih a ni lo tih AVBD hian sawi bawkin, thisen mamawh damloten a hun taka thisen an dawn theihnan leh nunna chhanna atan thisen pek uar zel turin mipui an sawm tih an sawi a ni.
2024-2025 chhunga thisen pek dan
-- Advertisement --
Blood Bank Dawn zat A thlawn Voluntary%
Civil Hospital Aizawl 16174 15111 93.43
Synod Hospital Durtlang 3143 3071 97.71
District Hospital Champhai 1964 1868 95.11
District Hospital Kolasib 1415 1328 93.85
Civil Hospital, Lunglei 3140 3136 99.87
Christian Hospital Serkawn 971 952 98.04
District Hospital Serchhip 730 713 97.67
District Hospital Lawngtlai 1593 1199 75.27
District Hospital Saiha 1091 1057 96.88
District Hospital Mamit 377 348 92.31
Zoram Medical College 4154 3783 91.07
Total 34752 32566 93.71