Siaha pump atangin Myanmar-a phurhluh tur oil pekchhuah khap

Siaha pump atangin Myanmar-a phurhluh tur oil pekchhuah khap
Siaha district magistrate chuan an district-a filling station atangin Myanmar-a phurh luh tur petrol leh diesel lak leh pek a khap.
Thupek a tihchhuahah magistrate chuan, tunlai hian Siaha district-a mi thenkhatin thenawm ram Myanmar lama hralh chhawn turin an district-a filling station thenkhatah petrol /diesel a hlawmin an la thin tih hriat a ni tih a sawi a. Hei hian mipui tan harsatna lian tak thlenin, an district-ah tuialhthei indaihlohna a awm phah fo thin tih a sawi.
Hei vang hian danin thuneihna a pek angin, Siaha district-a filling station-ten sawrkarin rate a bithliah aia sang, black market-in petrol /diesel hralh khapna a tichhuak a. Siaha district-a filling station zawng zawngin petrol litre 500 chin leh diesel litre 1000 chin chunglam chu phalna neia dahthatna (storage permit) nei hnenah chauh hralh chhuak turin a ti.
Tuialhtheia sumdawnna kaihhnawih thilah Myanmar leh ram dangah dan loa hralh emaw pekchhuah khap a ni tih a sawi bawk.
He dan bawhchhia chu Section 223 of BNS 2023 hmanga na taka hrem an ni dawn tih a sawi a. Thupek hian chhuah a nih atanga thla hnih chhung a huam tih a sawi.