A thlawnin bengdar sem

Coal India Limited Kolkata, Deen Dayal Sravana Foundation (DDSF) Andra Pradesh leh National Programme for Prevention and Control of Deafness (NPPCD) NHM Mizoram tangho chuan ri hriatna tha lo, bengdar vuah ngaite tan Thawhtanni khan a thlawnin bengdar (hearing aid) an sem a ni a. Larsap Dr Hari Babu Kambhampati leh minister K Sapdanga ten an hmanpui.
NPPCD kaltlanga ‘bengngawng awm lohna India’ siam tura hmalakna kaltlanga bengdar sem hi Coal India Ltd. in CSR hmanga an tum a ni a. NGO partner atan DDSF an hmang a ni. An ni nena thawk hoin NPPCD thawktute chuan Mizorama bengngawng, bengdar vuah ngai zawn chhuah hna an kalpui a ni.
District pathum – Aizawl, Lunglei leh Champhai ah bengdar hi sem a ni dawn a. Thawhtanni hian Aizawl district-ah bengdar 207 sem niin, Thawhlehni khan Lungleiah 65 sem tum a ni a, Ningani hian Champhaiah 67 sem a ni ang. A vaiin bengdar 339 sem a ni dawn a; hengte hi Rs. 20000 atanga Rs 60000 inkar an ni a, a senso hi cheng nuai 80 vel a ni.