Ramri ah boruak tha lo a awm awm kan hre rih lo – Home minister

Ramri ah boruak tha lo a
awm awm kan hre rih lo
– Home minister
Assam nena inrina lamah boruak tha lo inmung a awm awm an hre rih lo tih Home minister K Sapdanga chuan a sawi.
Assembly Session-ah leader of opposition Lalchhandama Ralte chuan, tunhnaia (Kolasib district) Saipum rama Assam lam atanga lo vah chungchang leh Assam-a MLA inthlanpui neih tur kaihhnawihah ‘ramri issue’ siam tumna laka Mizoram sawrkar inralrin dan leh ruahmanna a siam dan a zawt a ni.
Zawhna chhangtu Home minister chuan Saipum rama lo vah sawi hi kumin January tawp lam leh February tir lama thil thleng tawh kha a ni a, Assembly Session-a a demand sawi ni – March 11 khan complaint a lut a, Kolasib district bawrhsap address-a ziah a nih laiin amah aiin a dawng hmasa tih a sawi a. Engemaw tum nei lawk saa complaint hi thehluh a nih theih rualin, ramri chungchangah chuan tu pawh a hre hmasa apiang inhrilh tur an ni, tiin, Kolasib bawrhsap pawh hi an hriat ni la la hian a hmunah a kal nghal tih a sawi.
Ram an lo vah hi tin 70-80 hmun vela zau niin, an khawih chhunzawm tawh lohna turin hma lak a ni a, Silchar bawrhsap pawh hrilhhriat nghal a ni a, a ni pawh hian a tul angin a bawhzui tih a sawi a ni.
Assam nena ramria border outpost hoah inhnuhdawh a awm lo niin Home minister hian a sawi a. Hmun pakhatah erawh a hmunhma cheithat a nih dawn avangin an chhuahsan lailawk a, hei pawh hi an lut leh dawn tih a sawi.
Ramri ah hian mi leh sa an indah reng a, Assam inthlan dawn hnaih pawh nise, tun thlengin boruak tha lo zawnga thil inmung a awm an hre loa, boruak tha a awm reng theihna turin ramria bawrhsap-te chu inthianthatna lam hawi ‘event’ siam tura an inhrilh angin siam chhoh zel a ni tih a sawi bawk.