A thlawnin ran tan vaccine pe

September 28 kha World Rabies Day a ni a, he ni denchhen hian College of Veterinary Science & Animal Husbandary (CVSc & AH) Central Agricultural University, Selesih chuan ui leh zawhte tan anti-rabies vaccine an pe.
Khawvel hmun dang ruala World Rabies Day hi CVSc & AH, CAU Selesih hian Animal Health Centre Ramhlun North-ah Inrinni khan an hmang a. Vety College atangin zirtitrtu 8, staff 2 leh post graduate zirlai 8 chuan Ramhlun North Local Council huamchhunga ran 109 – ui 78 leh zawhte 31 hnenah a thlawnin anti-rabies vaccine hi an pe a ni .
Anti-rabies vaccine hmuchhuaktu, scientist hmingthang Louis Pasteur thih champha hriatrengnan World Rabies Day hi kum 2007 atang khan hman tan a ni a. Kumin thupui chu “Breaking Rabies Boundaries” tih a ni. CVSc &AH, CAU Selesih hian kum 2013 atang khan an hmang tan a ni.