A vawi 5 nan Aizawl FC an champion

Mizoram tualchhunga football club te inelna lian leh sum tamna ber Mizoram Premier League (MPL) season 11 chu thawhleh zan khan khelh zawh a ni a, a vawi nga nan Aizawl FC an champion. Aizawl FC hian final-a an khingpui Mizoram Police FC chu Lalawmpuia Sailo goal thun hmangin an hneh.
Mizoram Premier League-ah vawi li champion tawh a, champion ngun ber ni mek Aizawl FC hian RG Stadium-a an khingpui champion lai Mizoram Police FC lakah an khel tha hle. AFC hi an forward te an che rangin an hmuhnawm em em a, an mual lei player te an chetha a, an tlarhnung a phui tha em em bawk. Final hun pumin khel tha leh chak phu zawk an ni a tih ngam. MPL 10 leh I Day 2024 champion MPFC hian goal thun tur khawpin AFC an nawr tlang zo lo. MPFC hian free-kick atangin hlauhawm siam thin bawk mah se Aizawl FC tlarhnung thiatin clear chance an insiam thei lo thung.
Beisei anga inkhel hmuhnawm tling phak loah hian inkhel thunnuntu Aizawl FC tan Lalawmpuia Sailo chuan minute 35-naah tha zetin a pet goal a, hmahruaina goal a thun. Awmawma ball pet tha tak hian R. Malsawmkima a tihrilhhai hle a, che hman eih lovin a en goal. Awmawma goal thun bak hi chawlhlawk hmangin goal dang a luh belh thei lova, Aizawl FC in 1-0 a hmahruai chungin chawlhlawk an hmang.
Chawlhlawk hnu lamah Mizoram Police FC game a kang hret a, an si phurh sut ngei tumin tan an khawh nasa hle. MPFC hi set piece-ah an hlauhawm thei hle. Ball kangah hlauhawm thin mah se ground ball ah an khingpuite an khan lo hret thung. An khingpuiten an nawrna lak atanga talchhuak Aizawl FC nawr let a hlauhawm thei hle a, goal an thun belh teuh thei hle. Minute 35-naah Awmawma goal thun bak hun pumin goal lut a awm belh thei lova, Aizawl FC chu Mizoram Premier League champion thar an ni ta a ni.
Champion thar Aizawl FC hi MPL 11-ah an chungnung hle. League round-ah tlawm nei miah lovin an champion a, MPL-ah tlawm nei lova champion hmasa ber niin, MPL League champion shield la hmasa ber an ni. Semi-final leh final-ah an chak zawn leh bawk a, MPL 11 league round leh play off final thlengin tlawm an nei eih lo va record thar an siam. Tlawm nei lova champion hmasa ber an nih bakah hian MPL ah season khata goa thun hnem ber record thar an siam bawk. I Day-ah uiawm takin champion zo lo mah se, final-a an ngam loh Mizoram Police FC hneh letin MPL-ah hnuhma ropui zawk an hnutchhiah belh. MPL 11-ah hian Aizawl FC midfielder pawimawh Lalthankhuma chu ‘Best player’ ah thlan a ni.
Mizoram a I League club awmchhun Aizawl FC hi MPL a club hlawhtling ber an ni a, vawi nga an champion tling ta chiah. AFC hi kum 2014-15 khan a vawi khat nan an champion a, 2015-16-ah an champion zui leh. kum hnih an awl hnuin kum 2018-19-ah an champion am kum 2019-20-ah an champion zui leh nghal bawk. Kum 2024-ah an champion leh ta a, 2025-ah champion nawn leh ngei tumin tan an khawh ang.
MPL 11 awp bettu Aizawl FC hian mimal lawmman trophy leh cheng nuai 5 an dawng. Team lawmman an dawn bakah hian mimal chawimawina pawh an hui fai deuh vek bawk. AFC hian heng mimal chawimawina te hi an dawng. Vanlalhriatpuia (Best Goalkeeper), Lalchhawnkima (Best defender), Lalthankhuma (Best midfielder), Lalbiakdika (Best forward), Lalthankhuma (Best player) leh Lalbiakdika (Top Scorer – 12 Goals). Aizawl FC in mimal chawimawina an hui thup lai hian Mizoram Police FC rawlthar Michael Lalbiaksanga chu rawlthar tha ber (Emerging player) ah thlan a ni ve thung.