A vawi khat nan Kyiv-a sorkar hmun pawimawh beih a ni

A vawi khat nan Kyiv-a sorkar hmun pawimawh beih a ni
Ukrainian prime minister chuan indona a chhuah hnua a vawi khat nan Russia-in Kyiv-a an sorkar building pui ber an kap fuh tih a sawi.
Yulia Svyrydenko-i chuan building chung leh a chhawng chung lam a chhia a, kang thelhtuten a kang an thelh tih a sawi.
Kyiv-ah tho hian Svyatoshynsky district-a chenna in chhawng kuaa sang kah fuhah naute leh nula an thi bawk a, ruang dang pakhat zawn mek a ni tih thuneituten an sawi bawk.
Novopavlivka khuaah hmeichhia pakhat a thi bawk tih thuneituten an sawi.
Ukrainian air force chuan Inrinni zan tlai tawh tak atang khan Russia hian drone leh missile thahnem takin an bei a, 800 chuanga an kah thu a sawi.
Air force chuan missile pakua leh drone 56-in hmun 37 a kap fuh a, an kah thlak zing themin hmun riat a fuh bawk niin an sawi.
Kyiv-a sorkar hmun an kah fuh hi cabinet of ministers building an ti bawk a, Ukraine-a minister pawimawh tak takte pisa awmna a ni.
Inrinni zana thil thleng hi Russia-in Ukraine a beih meka tih dan thar an hman a ni a. A hma zawng kha chuan Kyiv lailia sorkar hmun hi beih a ni ngai lo.
Russian President Vladimir Putin-a’n muanna atana indawr a inpeih tih a sawi reng laiin beihna hi na takin a kalpui zel bawk tih tihlanna nia ngaih a ni.
Cabinet building hi sorkar, parliament leh presidential palace awmna a ni a. Chanchinbu mite pawh luh an phal rih lo va; mahse, helicopter hmanga a chung atanga kang thelh nana tui thlak laite erawh a lang.
Ukraine hmun dang, Zaporizhzhia-ah pawh nursery leh in eng emaw zat kah fuhnaah mi 17 an hliam niin region sorkar hotu, Ivan Fedorov-a’n a sawi.
Khawpui daia Novopavlivka khua chu Russian glide bomb-in fuhin hmeichhe pakhat a thi a, mipa pakhat a chin an la hre lo bawk niin Fedorov-a hian a sawi.
Russia hian President Volodymyr Zelensky-a khua, Ukraine lailia Kryvyi Rih pawh beiin hmun thum an kap fuh.
Kyiv thuneitute chuan khawthlang lama Svyatoshynkyi leh chhimchhaka Darnytskyi district-a chenna in tam tak kah fuh a ni a, kangmei a chhuak a, in tam tak a chhia niin an sawi.
Hetih lai hian Russian defence ministry pawhin an ram chhungah Ukrainian drone 69 an kap thla niin an sawi a.
Drone-te hi Russian oil pipeline pawimawh, Druzhba beihna tur niin Ukrainian unmanned aerial forces commander Robert Brovdi chuan a sawi a. Russia-a Bryansk region-a pumping station an kap fuh niin social media-ah a tar lang bawk.
Russia hian Ukraine hi February, 2022 atang khan a bei a, tunah hian Moscow thuhnuaiah Ukrainian ram 20% vel a awm tawh.