A vawilina’na final lut Hunthar

Hun pawimawhah Hunthar an hriam a, thawhtanni zan Ather Pro Volleyball League-ah set thum faia Chhinga Veng Spikers an hneh rualin a vawilina atan final an lut.
LPS Arena, Falkland-ah Huntharin team thawhhona \ha tak an lantir a, league-a an intawn \um ang bawkin semi-final lamah pawh set an hloh lo a, 25-22, 25-23, 26-24-in an chak.
Kum 2019 champion Chhinga Vengin set hnihnaah 21-19-in hma an hruai hman a, set thumna la thei turin 22-18-in an kalsan bawk, mahse, boruak sangah harsatna an tawk a, libero Lalhmingsanga che\ha hle chungin an fei tawk lo a, Yougank Baliyan a mal \an nasa hle.
Kum 2017 leh 2018 champion Hunthar tan Anurag Rawat chuan vawi 23 vaw tlain point kua a hloh a; Fabian Lallunghnema’n vawinga tisual chungin point 15 a thawkchhuak a, inbeihna tak takah an rin tlak.
Pro Volleyball chanchina team hlawhtling ber Huntharin kum zawnin final an lut a, nikuma an hneh loh Thutak Nunpuitu Team leh Tuichangral inkhel chak zawk nen Zirtawpni zanah champion nih an inchuh ang.
Spikers tan Yougank chuan point 34 hmuin 11 a hloh a, mimalin che\ha fal hle mah se a team-te set a lakpui zo lo a, amah thlawp thei ber Lalramhluna’n set hnihna a\angin a khel a, \um riat hlap tlain vawithum a tisual.
League-a an inkhelh \um aiin Chhinga Vengin hma an sawn na a, tawnhriat tlachham Mizo player-te’n vuak tlak an harsat avangin awmzia a nei tham lo. Yougank a ri m hle a, set khatna bikah point 11 a hmuh laiin a \anpui zinga amah hnaih ber Thangzika Pautu chuan point hnih a hmu.
Inrintawkna sang tak nen Huntharin bul an \an a, setter Remsangzuala’n ball sem rualin Lalnunfela’n a vuak tlak rualin 16-11-in set khatnaah an sang a; lehlamin an hnaih zo lo.
Set hnihnaah Chhinga Vengin na zawkin an nawrlet a, 16-16 a nih hnuah an kalsan. Yougank chuan a vanglai hmangin a elpui Anurag aiin a langsar a, a hmaa ball chhuak hlap tla zelin 21-19-in Spikers an sang.
Huntharin an paukhauh zawk tih lantirin Fabian-a’n a vuaktlak hnuah Chhinga Veng spiker Ramhluna hlap an dansak a, an nihrual. A hnuah 23-23 a nih laiin Ramhluna’n a service sual a, Anurag chuan set an lak zawn theihna hun \ha tihlawhtlingin sang tak a\angin a vaw tla.
Chhinga Vengin tan hmun siam thar lehin set thumna la thei turin beiseiawm takin an khel a, Anurag leh Wilson Lalremruata’n an vuak sual zawn hnuah 22-18-in an sang.
Hun pawimawhah talbuai lehin Yougank tih loh player dangin vuak tlak an harsat a, Hunthar tan Fabian-a’n a hlap tlak hnuah Anurag chuan point thum hmu zawnin 22-22-in an nihrual.
23-22-in Chhinga Veng sang leh mah se Huntharin net chung a\angin Yougank-a vuak an dansak a, inhnehtawk taka 24-24 a nih hnuah Yougank-a hlap dansak lehin Anurag chuan dan theih lohin a vaw tla ve thung a ni.
Hunthar player-te’n ngampa takin an khel tluan thei a, C. Lalhriatpuia’n \um kua vaw tlain point li a hloh a, Nunfela’n vaw khat chiah tisualin point ruk a hmu a, team tichak theiin an khel.
Nizan mipa semi-final hnuhnung zawk result tarlan hman lohah Tuichangral leh Thutak Nunpuitu Team intumin, Ningani zan hmeichhe final-ah Luangmual leh Diakkawn an inhmachhawn ang.