A zual zel HIV/AIDS… Eng tin?

On Dec 2, 2025 4 0

Nimin kha World AIDS Day a ni a, Mizoramah pawh district hrang hrangah hman niin report-in a tarlan dan chuan, Mizorama HIV/AIDS hmuhchhuah kum 1990 atanga kumin 2025 thleng, kum 35 chhungin Mizoramah HIV positive mi 32,544 an awm a, HIV/AIDS vanga thi mi 5,635 an awm tawh bawk.
India rama HIV/AIDS hluarna ber Mizoram a ni a, thisen test atanga 2.73% in HIV/AIDS an kai a, Mizoram dawttu Nagaland niin 1.37% an ni ve thung. National average hi 0.20% a ni a, Mizoram hi national average let 13.6 a ni a, Nagaland hi national average let 6.8 a ni ve thung.
NE state dangte nen kan inthlau hle a, Manipur-0.87% (tunhmaa a sang ber thin kha); Meghalaya 0.43%, Tripura -0.37, Arunachal Pradesh-0.25% an ni a, national average aiin an sang ve tho a, Assam (0.13%) leh Sikkim (0.11 %) te erawh national average hnuaiah an awm ve thung.
Kum 35 chhunga HIV positive hmuhchhuah hi 32,544 a ni a, chawhrualin kum 35 chhung hian kum tin HIV+ve 929, thla tin 77, ni tin 2.5 hmuhchhuah ang a ni.
HIV/AIDS vanga thi hi kan pung chho zel bawk. Kumin January thla khan Mizorama HIV/AIDS vanga thi zawng zawng report chu 5511 a ni a, thla 10 hnuah 5635 a tling leh ta a. Chumi awmzia chu chawhrualin ni 2.4 danah mi pakhat zel thi ang an ni a, a pumpui thuah chuan chawhrualin ni 2.2 dan zelah pakhat thi ang a ni. He chhiarkawp atanga lo lang ta chu, ni tin HIV+ve 2.5 hmuhchhuah a nih rualin, ni 2.2 danah HIV/AIDS vangin mi pakhat an thi zel tihna a ni; a rapthlak hle!
HIV case-ah hian a ram pum huap ang chuan India a tlahniam duai duai (49% fewer cases; 81% fewer deaths) a, Mizoram erawh tlakhniam duai duai lam a la lang ve chiah lo; hei hi eng tin nge ni zel dawn?
HIV/AIDS dona thawm hi chu a ring tha viau, a langsar viau thin bawk; mahse, kan do dan hi kan pehhel deuh em aw a tih theih. Red Ribbon football, competition hrang hrang, poster, sticker, etc etc… heng hmalaknate hi a tul a, a tangkai bawk ang; mahse, a sensona tur dik zawk lam hi kan luhchilh thuk lo zawk te hi a lo ni hlauh ang e? Inenfiah ila, koki lehlam hi kan lo hmang rim rei lutuk te hi a ni thei em? Ko thlak nachang te hi kan lo hre lo palh ang e!(?)