AAI kuta airport hlan tihfel hun thla hnih vel chauh awm tawh

AAI kuta airport hlan tihfel hun
thla hnih vel chauh awm tawh
Airport Authority of India (AAI) kuta Lengpui Airport hlan chungchanga Union Home minister Amit Shah hriatpuia bawhzui hun tiam chu thla hnih vel chauh a awm tawh tih sawi a ni a, hemi hmaa tih fel hman tum turin Mizoram sawrkar an ngen tih hemi kaihhnawiha intelkhawmna pawl chuan an sawi.
Lengpui Airport Forum sawi danin, chief minister Pu Lalduhoma Delhi zinin tum hnih Union Home minister nen hian Lengpui Airport chungchang hi an sawi tawh a. Kumin March 15-a Aizawla Amit Shah a lo zin tum khan NGO Coordination Committee hnenah Lengpui Airport hi thla thum chhunga AAI kuta hlanfel a, thla 6 chhunga tichangtlung tura hma lak nghal a nih tur thu a lo hrilh a. CM Delhi zin haw in Assembly House-ah kumin March 13 khan Amit Shah nena inbiakna avangin AAI lam kawng zawh thei thut a nih mai theih thu a sawi tawh bawk laiin, hemi chungchang RTI hmanga kumin July 2-a zawhna Mizoram sawrkar GAD Aviation Wing-in a chhanna atangin, bawhzuina tak tak a la awm lo tih hriat a ni tih a sawi.
Airport tha, changtlung leh him neih thuai a nih theihnan sawrkar chu hma la thuai turin an ngen tih a sawi a ni.
Kumin April 15-a NGO Coordination Committee-in New Delhi-a Union Home secretary an hmuh tumin, Mizoram chief secretary hnenah proposal thehlut turin lehkha a thawn tawh tih a lo hrilh a. Mizoram sawrkarin hemi ang hian proposal hi Ministry of Civil Aviation secretary-ah thawn thuai se an duh tih Lengpui Airport Forum hian a sawi.
Kumin July 7-a New Delhi-a chief minister leh Union Home minister inbiakna anga Union Cabinet-in an ngaihtuah thuai theihnan Mizoram sawrkarin draft agreement proposal chu sawrkar laipui Ministry of Civil Aviation-ah emaw AAI chairman-ah emaw thawn thuai se, Lengpui Airport hi AAI-a hlan dan tur chu hmarchhak state dang leh a bikin Nagaland state-in a tih dan angin land lease agreement tih fel thuai theih a ni dawn tih a sawi bawk.
‘Tunhmaa Mizoram sawrkar leh AAI indawrna chungchanga harsatna pakhat sawi thin, Mizoram sawrkarin Lengpui Airport security senso tum zui zel tura tih thin chu kumin April 24 atang khan Ministry of Home Affairs ruahman angin CISF dah an ni tawh a, National Aviation Security Trust atangin a senso pawh tum tura ruahman fel tawh a ni. Kumin April 29-ah AAI Team-in Lengpui Airport rawn enfiahin ruahhmanna sawipui tura lokal chu, a mamawhtu zawk state sawrkar hotute leh CM pawhin tha takin thil an lo sawipui lo nia hriat a ni,’ a ti.
Lengpui Airport tichangtlung theitu tur ber leh India ram civil airports enkawl tura Parliament-in dan a siam – the Airport Authority of India Act 1994 hnuaia Lengpui Airport enkawl thuai a nih theihnan AAI kutah hlan thuai a tha ber tih Lengpui Airport Forum hian sawiin, ‘Airport Development & Management – cargo terminal, runway siamthat, night landing facility, ATC tha zawk leh international airport-a hlankai leh thil tul dang titheitu ber – competent chu AAI chauh a ni. Mizoram hian NE state dang – Imphal, Guwahati, Agartala airports adt. a umphak thuai a tul a. Airport tha leh changtlung, sum sen ngai loa kan neih tluka hlu chuang hi Mizo mipui tan leh sawrkar tan a awm thei chuang lo,’ a ti.
Mizo mipui chhuahka leh ‘lifeline’ pakhat Lengpui Airport thatna tura hmathlir thui tak neite ngenna leh tunhma pawha thil la awm ngai reng reng lo, Union Home minister-in duhsak taka airport tha Mizoram-in a neihna tur a intiamna leh sawihmuh tha lutuk chu a hun tiam ralna thla hnih vel chauh awm tawh hi a liam hma ngeiin chief minister leh a kaihhruai sawrkarin tihhlawhtlin ngei tuma hma la nghal turin a ngen tih a sawi a ni.