Adani Group nen Chhimtuipui lui khuah dan tur sawikhawm

Adani Group nen Chhimtuipui
lui khuah dan tur sawikhawm
Kawlphetha megawatt 460 tharchhuah theihna tura ngaih, Chhimtuipui (Kolodyne) lui khuah dan tur chu Power minister F Rodingliana hoin Adani Group aiawh nen Aizawlah sawikhawm a ni.
Thawhtanni tlai khan Power & Electricity minister ho hian department hotute nen Adani Group aiawhte inkawmin, Mw 460 thar chhuak thei tur Kolodyne Hydel Project siam dan tur leh Mizorama power sector tihhmasawnna kawnga state sawrkar leh Adani Group thawh dun theih dan tur an sawiho.
Minister F Rodingliana chuan, Mizoram sawrkarin power intodelh a tumna kawngah thawhpui tur company tha a dap mek lai a, India rama company lian leh rintlak ber zing ami Adani Group-in Mizoram lam hawia hma lak a duh chu lawmawm a tih thu a sawi a. Hydro power sector-ah Mizoram-in hman tangkai theih sang tak a nei a, chu’ng hai chhuak tur chuan puihna a mamawh a, Adani Group an rawn lang chu phurawm a tih thu a lo hrilh a ni.
Adani Group vice president of Business Development – Hydro Pump Storage Project Sumit Verma chuan, tunhnaiah green energy development lamah nasa takin hma an la a, helama Mizoram-in haichhuah tur a neihte haichhuah pui a, thawhhona tha tak an neih a beisei tih a sawi a. Project site tlawh tura lokal an nih angin a hmunah an kalchilh nghal dawn tih a sawi a ni.
Inkawmnaah hian project site pahnih – Chhimtuipui (Kolodyne-II) Hydel Project ruahman mek leh Darzolui Pump Storage Project site chu Adani Group tlawh tura rel niin, Thawhlehni khan heng hmunhma tlawh hian an zinchhuak nghal a ni.