Adesanya hmachhawn tur Strickland

UFC fighter lar, middleweight champion Israel Adesanya khingpui tur tihchian a ni a. A khingpui tur hi Sean Strickland a ni.
September 10, khian Sydney, Australia-ah UFC 293 neih a ni dawn a, hemi hunah hian Israel Adesanya chuan a kawnghren kawl mek humhim tumin American fighter Sean Strickland a hmachhawn dawn. Champion lai Adesanya khingpui tur atan hian Dricus du Plessis ruat a ni zet a. A khingpui tur South African hi a inhliam vangin khingpui tur dang zawn a ngai a, Sean Strickland hi an thlang fel ta a ni.
Fighter lar Israel Adesayna hian April thla khan a elpui lian tak ni thin Alex Pereira chu knockout in a hneh a, UFC middleweight champion a ni nawn leh. Kick boxing lama tawn hriat ngah tah Adesanya hian UFC-ah vawi 26 fight a hmachhawn tawh a, vawi 24 a chak tawh a, tlawm zawkah vawi hnih a tang tawh. September ni 10-a a khingpui tur Stric-kland hnehin champion nawn leh ngei a tum ang.
Fighter hriat hlawh tak Israel Adesanya hmaa ding tur Sean Strickland hian UFC-ah vawi 32 fight a hmachhawn tawh a, vawi 27 a chak a, tlawm zawkah vawi nga a tang tawh. Adesanya a hmachhawn tur hi title fight a hmachhawn hmasak na ber tur a ni a. Kawnghren hlawh chhuah theihna hun remchang a neih chhawr tangkaiin world champion nih a tum hle ngei ang.
Adesanya khingpui tur atan Strickland thlan fel a nih rual hian Dana White chuan Conor McGregor khingpui tur chu Michael Chandler ngei a nih thu a sawi nawn leh bawk.