Administrative reform leh moral reform neih theihnan dan ennawnin kan siamtha – Chief minister

Administrative reform leh moral reform
neih theihnan dan ennawnin kan siamtha
– Chief minister
Kum khat an sawrkar tawh chhungin dan siamthat ngai engemawzat ennawnin an siamtha mek zel a; heng hmalakna in a tum ber chu, ram rorelnaa kalphung dik (administrative reform) a nih rualin, chhungrila dikna (moral reform) kan neih theihnana kalphung thar mipui sawrkar hmalakna a ni tih chief minister Lalduhoma chuan a sawi.
Kum 2024 atan Thawhtanni khan ZPM party office khar a ni a, hemi puala inkhawmah Lalduhoma chuan, kum tam tak sawrkar kalphung dik an lo aupui tawh chu Pathian leh mipui zarah sawrkarna an chan takah chuan engti ang takin nge he kalphung thar mipui sawrkar hian ram rorelnaah danglamna a thlen tih Zoram mipuiin ngaihven a tul hle tih a sawi.
Kumkhat chhungin Mizoram Legislative Assembly-ah speaker kaihhruaiin Bill 46 an pass tawh a, dan siamthat ngai leh herrem ngai engemawzat an siamtha tawh tih a sawi. Dan thar, Mizoram Private Placement Agencies Regulation Bill 2024 an duang mek a, thalaite dan ang thlapa ram danga hna an thawh theihna turin ruahmanna an siam tih a sawi a ni.
Mizoram Youth Commission Bill hmangin thalaite kawng an sialsak dawn a, Labour Laws 44 vel an neih chu mumal zawkin dan pali ah an khaikhawm dawn tih chief minister hian a sawi.
“Sawrkar hnathawkte inkaihruaina – Service Rules leh Recruitment Rules siamthat a lo tul tawh hle a, tunah hian chutiang Rules 63 chu kan siamtha tawh. Heng bakah hian dan siamthat ngai engemawzat kan ennawn a, heng hmalakna hian a tum ber chu, ram rorelnaa kalphung dik (administrative reform) a nih rualin, chhungrila dikna (moral reform) kan neih theihna tura kalphung thar mipui sawrkar hmalakna a ni,” a ti.
Aikal lak tih tawpte, sawrkar hnathawkten hunbi an vawn dikna tur bakah inrenchemna kawngah theihtawpin hma an la a, ram rorelna kalphung a dik theihnan kawng tam takin hma an la a, kum khat chhungin kalphung thar mipui sawrkarin ram rorelnaah danglamna tam tak an thlen tawh tih a sawi a ni.
CM thusawi dang:
# Industrial Policy 2024 kan duang a, thil siamchhuah lamah nasa taka hma sawn kan tum.
# Zu khap burna dan (Mizoram Liquor Prohibition Act) uluk tak leh fimkhur taka ennawn a ni.
# Mipuiin awlsam zawka sawrkar an dawr theihnan Right to Public Service Act kan siamtha
# Village Council Act kan neih hi a hlui tawh avangin a thar kan siam dawn
# Autonomous District Council theihtawpin kan ngaihsak a, dan siamthat ngai engemawzat kan siamthat sak tawh tih.
# Ram chhunga thil dehchhuahte ngaihhlut a nih theihnan Mizoram Preferencial Store Purchase Rule 1994 kan ennawn mek
# Thil siamchhuahna hmun atanga hmawnraw tha leh tlawm zawk kan lei theihnan Mizoram Procurement Preference Policy 1994 siamrem mek a ni. Hei hian nasa takin sawrkar sum a hum an beisei bakah hmanraw tha leh tlo zawk neih theih beisei a ni.