AFC an chak zo lo

September 23, Thawhtanni khan LZ Juice MPL 11, round 12-na khelh a ni a. Hmahruaitu Aizawl FC in hnehna an chang zo lo. Thawhtanni a inkhel dangah champion lai Mizoram Police FC pawhin hnehna an chang zo lo bawk.
Season kal mekah tlawm la nei lo, table hmahruaitu nia semi-final lut chiang tawh Aizawl FC hian semi-final luh tuma tan khawh mek Ramhlun Athletic FC an hmachhawn a, goal awm lovin an inhnehtawk. Hmahruaitu Aizawl FC lakah tlawm an pumpelh a, point an hmuh theih vangin Ramhlun Athletic FC tan semi-final luh beiseina a sang leh zual.
Thawhtannia inkhel hmasa zawkah semi-final lut theih dinhmuna ding pahnih SYS FC leh Mizoram Police FC an inhmachhawn a, 2-2 a inhnehtawkin, point khat ve ve an hmu.
Champion lai Mizoram Police FC lakah rawl thar team hmuhnawm SYS an khel tha viau a, chawlhlawk hmain goal hnih an thun hman. An hmahruaina goal hi minute 1-na leka Andres Lalhmingmuana thun a ni a. Nicolas Ngurthansaga chuan minute 38-naah an goal hnihna a thun leh bawk.
MPFC in si an phurh reng hnuin Lalmuankima leh Isak Malsawmkima ten goal an thun a, tlawm an pumpelh thei hram a ni.