Afcon 2023 tan a ni dawn
Africa khawmuala ram hrang hrangte football a an inelna ngaihhlut hlawh tak Africa Cup of Nations 2023 chu zanin zanlai atangin khel tan a ni dawn a. Inelna thlengtu Ivory Coast leh Guinea-Bissau ten bul an tan ang.
Afcon 2023 hi January ni 13 ah khelh tan a ni ang a, Abidjan khawpuia Alassane Ouattara Stadium-ah inelna thlengtu Ivory Coast leh Guinea-Bissau an inhmachhawn hmasa ber ang a. Ferruary ni 11-ah final khelh a ni ang. Ivory Coast hi Afcon 2021 thleng tura ruat an ni a. Rokhawlhna thenkhat a awm vangin an thlen hun tur sawn hlat hret hret a ni. Cameroon chuan Afcon 2021 a thleng ta zawk a. Ivory Coast hian Afcon 2023 chu 2024 ah an thleng zui leh ta a ni.
Afcon ah hian vawi sarih champion tawh Egypt chu champion ngun ber an ni a. Mohamed Salah hova inlan tur Egypt hi Group B-ah an awm a, Mozambique hmachhawnin bul an tan ang. Group B-ah hian Egypt bakah football ram lian Ghana an awm a, group awlsam a ni dawn lo. Ghana bakah hian Cape Verde leh Mozambique te an awm ve bawk. Champion lai Senegal chu Group C-ah Cameroon, Guinea leh Gambia te nen an awm tlang a, football a hnuhma nei tha Cameroon nen hian group champion nih an inchuh zui viau tura ngaih a ni. Champion lai Senegal hian an trophy kawl mek humhim turin thapui an thawh ang.
Afcon 2023 ah hian ram 24 te champion tumin an inlan dawn. Ram 24 te hi group parukah an inthen a, group khatah team li zel an awm. Group champion leh pahnihna ten last 16 an lut ang a. Pathumna ni zinga titha zual paliin last 16 an lut ve leh bawk ang.
Afcon 2023 hi Ivory Coast a khelmual hrang hranga Alassane Ouattara Stadium, Abidjan (capacity 60,000), Felix Houphouet-Boigny Stadium, Abidjan (capacity 33,000), Charles Konan Banny Stadium, Yamoussoukro (capacity 20,000), Stade de la Paix, Bouake (capacity 40,000), Amadou Gon Coulibaly Stadium, Korhogo (capacity 20,000) leh Laurent Pokou Stadium, San Pedro (capacity 20,000) ahte khelh a ni ang.
Africa Cup of Nations (Afcon) hi kum 1957 atanga khelh tan a ni a, kum hnih khat dan (kum hnihna) zelah khelh thin a ni. Champion hmasa ber chu Aigupta (Egypt) an ni a. Final-a an khingpui hmasa ber Ethiopia chu sili faia hnehin an champion. Egypt hi vawi sarih champion tawhin, champion ngun ber an ni mek bawk.
Afcon 2023 Group
Group A: Ivory Coast, Nigeria, Equatorial Guinea, Guinea-Bissau.
Group B: Egypt, Ghana, Cape Verde, Mozambique.
Group C: Senegal, Cameroon, Guinea, The Gambia.
Group D: Algeria, Burkina Faso, Mauritania, Angola.
Group E: Tunisia, Mali, South Africa, Namibia.
Group F: Morocco, DR Congo, Zambia, Tanzania.