Afghan Foreign Minister Muttaqi-a’n India tlawh dawn

Afghan Foreign Minister Muttaqi-a’n India tlawh dawn
Afghan Foreign Minister Amir Khan Muttaqi chuan karleh Ningani hian India a tlawh dawn a, hei hi August, 2021-a Afghanistan-a Taliban-in thuneihna an chan hnuah Kabul mi pawimawhin New Delhi a tlawh hmasak ber tur niin India-Taliban inkara bung thar kaina tur a ni dawn.
United Nations Security Council chuan Muttaqi-a hi ram dang zin a khuahkhirhna hlihsak zawkin New Delhi-ah hian October 9 atanga 16 chhung a zin an phalsak a. Khuahkhirhna hlih hi Taliban sorkar leh an bul hnai ramten inkungkaihna an siamna remchangah hman an tum a ni.
Indian palaite pawh hemi atan hian an lo inbuatsaih lawk tawh a. January atang khan Foreign Secretary Vikram Misri leh IFS officer J.P. Singh-a telin Indian thuneitute chu Muttaqi leh Taliban hruaitu dangte nen vawi tam an lo inbe tawh a, ram dang daiha inbiak pawh an nei.
Foreign Secretary Misri-a hian Afghan Foreign Minister Muttaqi-a hi Dubai-ah kawmin hemi tum hian New Delhi-in Afghanistan-a mi chengte a puihna lam an sawi a, a bikin hriselna leh raltlan chhawmdawlna lam an thlurbing.
An inpawh zualna ber erawh India-in Pakistan-a hlawhtling taka Operation Sindoor a kalpui hnu, May 15 kha a ni a, External Affairs Minister S. Jaishankar-a’n phone-in Muttaqi hi a bia a, kum 2021 hnua minister inbiakna hmasa ber a ni.
Hemi tum hian Jaishankar-a hian Taliban sorkarin Pahalgam-a firfiak chetna a dem avanga lawm thu hrilhin India chu ‘hman lai atang tawh Afghan mipuite thian’ a ni reng tih a hrilh.
April thla khan Taliban hian India awp chin Kashmir-a Pahalgam-a mi firfiakte chetna chu Kabul-a Indian thuneitu sangte nen an inbiaknaah a dem thu a sawi a. Hei hi India leh Afghanistan ramten Pakistan thlawp firfiaka chetna an duh lohnaa an inlungrualna a ni.
Hemi hnuah hian India hian Afghanistan-ah puihna tam zawk thawnin ei tur, damdawi leh hmasawnna dinna tur thil a pe a. Taliban sorkar pawhin India hnenah hian an mamawhte pawh an thlen nia sawi a ni a, energy bakah hmasawnna ruhrel dinnaa thawhho dan tur pawh an dap nia sawi a ni.
September-a lirnghing an tawhah pawh khan India hi a che chhuak hmasa ber zingah telin chhungkuaa awm theihna puanin 1,000 leh ei tur tonne 15 a thawn nghal a. A hnuah chhawmdawlna dang – damdawi, hmanraw hrisel, puanlum le generator hrang hrang tonne 21 a thawn leh bawk.
Taliban-in August, 2021-a thuneihna an chan hnuah India hian Afghanistan-ah wheat tonne 50,000 dawn a thawn tawh a. Damdawi leh hri leng laka invenna tonne 330 chuang, pesticide litre 40,000 leh ni tin mamawh hrang hrang a thawn a. Hengte hi ei tur, hriselna leh thil danga rethei tak Afghan maktaduai telin an tangkaipui nia hriat a ni.
Afghan Foreign Minister Muttaqi-a’n India a tlawh tur hi Kabul nena inkungkaihna siam tum tak, Pakistan tan erawh ngeiawm hle tura ngaih a ni a. Islamabad hian kumin kum tir khan Afghan raltlan 80,000 chuang a thawn kir a, hei hi India nena an inkar siamna inhawn tannaa ngaih a ni.
Mi thiamte chuan Muttaqi-a’n New Delhi a tlawh tur hi Kabul-in ram dang a kawmngaih dan thlaka Pakistan-a a innghah thin thlak a tumna niin an ngai.
India tan pawh Taliban sorkar hnaih hi an ram atanga firfiaka chetna laka invenna atan a pawimawh a. Chinese leh Pakistani ten luhchilh thuk an tum zelnaa an kara a tlak zehna tur tha nia ngaih a ni bawk.