Chhatisgarh-ah Maoist 103 inpe
Bijapur district, Chhattisgarh-ah Ningani khan Maoist 103 an inpe a, an zinga 49-te luman chhiar belhkhawm chu Rs vaibelchhe 1 a tling nghe nghe tih police-in an sawi.
Inpete zingah hian hmeichhia 22 an tel a, police leh Central Reserve Police Force (CRPF) hotu liante hnenah an inpe a. CPI (Maoist) chhungah ngaihdan inang lo leh thawrawng a awm tih an sawi niin Bijapur Superintendent of Police Jitendra Kumar Yadav chuan a sawi.
Tun tum hi Chhattisgarh-a tum khata left-wing extremist-te inpekna lian ber pakhat a ni.
Bastar huam chhunga hmasawnna hna nasa taka thawh chuan an rilru hminin helna kalsana ralthuam tunga nun pangngaia nun an châk phah niin a sawi bawk.
Inpete hian Bastar Range police-in hel inpete tana chhawmdawlna tur an duan, ‘Poona Margem (Rehabilitation for Social Reintegration)’ bakah Chhattisgarh sorkarin ‘Niyad Nellanar’ (your good village) scheme an kalpuia thingtlang kilkhawr tak taka hmasawnna ruhrel an din chuan a hip niin an sawi a. State sorkarin inpe tharte chhawmdawl zuina tur a duan chuan inpek duhna a pe bawk niin SP chuan a sawi.
Inpe zinga kum 36 mi, Santosh tia koh, Lachhu Punem hi divisional committee member a ni a. Guddu Farsa (30), Bhima Sodhi (45), Hidme Farsa (26) leh Sukhmati Oyam (27) te chu platoon party committee member niin an zavai hian luman Rs nuai 8 theuh nei an ni.
Maoist inpe palite chuan luman Rs nuai 5 theuh an nei a, 15-in Rs nuai 2 theuh, 10-in Rs nuai 1 theuh, 12-in Rs 50,000 theuh leh pathumin Rs 10,000 theuh an nei bawk.
Inpe zingah hian RPC (Revolutionary Party Committee) member tam tak an tel a. Left-wing extremist movement hi Maoist hruaitu lawkte tun hnaiah venhim hna thawktuten an thah nasat bakah inpe an awm nual tak avangin inpek ve an duh ta niin Yadav-a chuan a sawi.
Tuna mite nen hian kuminah Bijapur district-ah hian Maoist 410 an inpe ta a, mi 421 man an ni tawh bawk tih SP chuan a sawi.
“Sorkarin inpete chhawmdawlna a kalpui mek chuan Maoist-te tharum thawh bansan duhna a neihtir a. Inpe chhungte hian nun pangngaia nun leh khawtlanga tel ve an châk bawk a ni,” tiin SP chuan a sawi a, mi dangte pawh khawtlang nun pangngai zawm zel turin a sawm bawk.
Maoist inpete hi Rs 50,000 theuh pek an ni ang a, sorkarin kalphung a neih angin chhawmdawlna dang pek zui an ni dawn bawk.