Afghan Refugee te chhuak turin ti-Pakistan

Pakistan sorkar chuan a tawpna atan an rama raltlan Afghanistan ram atanga lo kal te chu an mahni duhthlanna ngeia October ni 31 aia tlai lo ah Pakistan ram chhuah san turin a ti.
Pakistan rama sorkar lailawk (Interim government) chuan danloa Pakistana lo pem lut te chu November ni 1 hnu lama hmuh an la nih chuan na taka hrem an nih tur thu thuchhuah a siam a ni.
Interim Home Minister Sarfraz Bugti chuan chanchinbu mite hnenah sawiin, “Danloa lo lut te thawn kir lehna tura inbuatsaihna zawng zawng peih fel vek a ni tawh” tiin a sawi a ni.
Home Minister chuan thuthar thehdarhtu te chu hrilhin danloa lo lut te chu chhuak tura tih an nih avanga an lehkha pawimawh te tih fel a nih hma loh chu la awm rih tura tih an nih thu a sawi a.
Heng danloa lo lut te hi damdawi inenkawlna tur te, hmeichhia, naupang leh kum upa te chu zah taka enkawl an nih thu a sawi bawk a ni.
Bugti chuan, “Pakistana danloa awm khua leh tui te hi November ni 1 hnu lam thleng erawh chu engmah kan tiam theilo a ni” a ti. November ni 1 hnu lamah chuan mi tupawh danloa Pakistan rama awm hmuha man an nih chuan an rama thawn kir tura buatsaih nghal an ni ang a ti.
Bugti chuan danloa khawsa te man an nih chuan jail-a thawn tur nilo in “holding centres” ah lak tur an ni a, heta tang hian danloa lo lut te chu Pakistan atanga thawnchhuah an ni ang a ti. Pakistan sorkar chuan danloa lo lutte chuan an mahni duhthua an chhuah dawnin lehkha pawimawh, visas, transportation leh pawisa inthlengtawnna te chu an nei tur a ni, tiin a sawi a ni. P
akistana danloa lut zawng zawng atangin mi maktaduaih 1.7 vel te chu Afghan raltlan te an ni. Pakistan-in ram dang mi a hnawhchhuah chungchang ah hian Afghanistan leh khawvel hmun hrang hranga human rights group atangin dodaltu an tam em em a. Pakistan ram ngeiah pawh a huhoa in thawn hawna dodalna hi an kalpui ve reng a ni.
He a huhoa inthawn haw na hi titawp tura nawrna a awm reng laiin Pakistan chuan danloa lo pem lut te chu an mahni duh thu a chhuak turin a ti reng tho a ni. Pakistan sorkar chuan danloa lo pem lutte chu a finfiah vek thu leh an awmna pawh a hriat vek thu a sawi a ni.
Pakistan hian a huho a Afghan ram mi te hnawhchhuah a tih chhan chu Afghan mite hian Pakistan ramah dan nasa taka an bawhchhiat avang leh smuggling te, sipai beihna te leh sorkar duhloh zawnga khawsak an chin vang te niin an sawi. Kumin chhunga thih chilh bomb vawi 24 tih puah zinga vawi 14 chu Afghan te tih a ni. He in thawnkir ruahmanna hi Pakistana Taliban lungawilo Tehrik-e-Taliban ten Pakistan beih an tum vang niin an sawi bawk a ni.