Afghanistan lakah England an mualpho

India ram khawpui hrang hrangah khelh Cricket World Cup 2023-ah champion lai England chuan Pathianni khan an match thunnaah Afghanistan an hmachhawn a, an hneh ngei tura ngaih lakah tlawmin an mualpho. Afghanistan in England an hneh nawlh hi Cricket World Cup-a inlehthalna lian zual zingah chhiar tel a ni nghal.
Champion lai lakah Afghanistan in an vaw hmasa a, Over 49.5-ah run 284 an thawkchuak thei hram chauh. Afghanistan tan hian Rahmanullah Gurbaz chuan ball 57 atangin run 80 a siam a, he inkhela run siam tam ber a ni. Curbaz bakah hian Ikram Alikhil chuan ball 66 atangin run 58 a vawchhuak a, a chetha thawkhat viau bawk. Ball khat leka over 50 khel tling lo chiah chunga run 284 an siam hi England tan khum harsa tura ngaih a ni hran lova, vaw hnuhnung zawk England an chak ngei rin a ni.
England vuak hun a thleng a, beisei an phak ta lo hle thung. Afghanistan bowler ngam lovin an thi zawih zawih a ni ta ber mai a, over 40.3 ah run 215 chauh siamin an out fai vek a, an tlawm chiang hle. England tan hian Harry Brook chuan ball 61 a hmachhawn atangin run 66 a siam a, champion lai tana run siam hnem ber a ni. Brook hi che tha thawkhat viau mah se a khelhpui ten an thlawp zo lo viau a, run siam tam lama amah hnaih bertu Dawid Malan chuan ball 39 a hmachhawn atangin run 32 chiah a siam.
An hneh ngei tura ngaih Afghanistan lakah an tlawm leh tak vangin champion lai England an chetha lo chhunzawm. World Cup 2023-ah England hian vawi thum khel tawhin vawi khat chiah an chak a, vawi hnih an tlawm tawh. Khelh thum atanga point hnih hmuin, panganaah an awm mek. An hneh loh Afghanistan hi inelna neih mekah ranking a hniam ber dawttu an ni a. Chuti chunga champion lai England an hneh nawlh hi Cricket World Cup-a inlehthalna lian zingah chhiar tel a ni nghal. Cricket World Cup-a inlehthalna lian zual zingah kum 2011 ah Ireland in England an hnehte, 1983-ah Zimbabwe in Australia an hneh leh kum 1996 ah Kenya in West Indies an hneh nawlh kha a langsar zual zingah a tel a. England hnehtu Afghanistan hian hnuhma thar an hnutchhiah thar ve leh ta a ni.
Cricket World Cup khelh mekah a thlengtu India chuan inkhel vawi thum hmachhawn tawhin a la chak vek a, point ruk hmuin hma an hruai mek. India ang thoin Newzealand in point ruk an hmu ve tawh bawk a. Cricket thiam ram Australia erawh chu vawi thum tlawm tawhin point an la hmu lova, ram 10 inel zingah a mawngphah an ni mek. Cricket World Cup 2023 hi October ni 5 a khelh tan kha a ni a, November ni 19-ah khelh zawh tura ruahman a ni. Champion in US Dollar maktaduai li an hlawh ang.