Afghanistan lirnghingah mi 2,000 thi tling tawh
Afghanistan chhimchhak lam tlangrama Pathianni zana lirnghing avanga chhiatna thlenna hmunah chhanchhuah hna thawktute chuan ruang an hmuh chhuah belh zel a, thi hi mi 2,200 chuang an ni tawh niin Taliban sorkar thupuangtuin a sawi.
A hma khan mi 1,400 vel thi anga sawi a ni a. Taliban thupuangtu, Hamdullah Fitrat-a chuan Ningani khan mi 2,205 an nih tawh thu a sawi.
“Puan in kaihah mite khawsaktir an ni a, first aid leh rikruma mamawh ang chi pek mek zel an ni,” a ti.
Ningani khan nghing nawn vawi khat a awm leh a, chhanchhuah leh mi zawn hna la thawh zel a ni a. Ningania nghing leh hi magnitude 6.2-a na niin thil tihchhiat leh thi an awm belh hriat a ni lo.
Pathiannia lirnghing kha tun hnaia thi an tam berna zinga mi niin a intanna kha lei hnuai km 10 emaw lek a nih avangin lei pawn lamah a thawk na hle a ni.
Magnitude 6.0-a na lirnghingah hian mi 3,640 vel hliam awmin Thawhlehni khan magnitude 5.5-a nain a nghing leh tih Taliban chuan a sawi a. UN chuan in chim karah mi tam tak an la tan avangin thi hi an pun a rinawm a, a bikin a tuar na ber, Kunar province-ah an pun ngei a rinawm tih a sawi.
World Food Programme Afghanistan Director John Aylieff chuan, “A hmuna thil thleng chu rapthlak tak a ni. Inte chu a chim vek a ni,” tiin Al Jazeera hnenah Ningani khan a sawi.
Thi tam berna hi Kunar province niin an inte hi thing leh hluma lui kam phaizawl, tlangram nena an inthenna lai vela ding a ni tlangpui hlawm.
An awmna lai hi a chhengchhiain a kilkhawr a, thlen a harsa em em a. Dakra thum lirtheia kal hnua kea darkar hnih kal leh ngaite a ni hlawm.
Thuneitute chuan in 6,700 chuang a chhia tih an sawi a. Dam chhuakte chuan an in chim chhe karah an chhungte an zawng hlawm.
Taliban thuneitute chuan helicopter an tir chhuak a, sipai commando-te thlakin dam chhuakte an pui a. Tanpuitute chuan lei min leh lung tlain kawng a hnawh karah kein thui tak tak kalin chhiatna thlenna khuate an pan hlawm.
Afghanistan hian tun hma lam pawhin lirnghing na tak tak an lo tuar tawh a, a awmna lai hi Indian leh Eurasian plate insutna lai, innawka a chet fona lai a ni.
October, 2023 khan khawthlang lama Herat province-a lirnghingah mi 2,000 chuang an lo thi tawh a. A hma kum chiahah magnitude 6.1-a nain khawchhak lama Paktika, Paktia, Khost leh Nangarhar province-te sawiin tam tak an thi bawk.