Africa-ah zawnghri leng mek
World Health Organization (WHO) chuan Africa-a Mpox leng mek chu ‘public health emergency of international concern’ ah a puang a.
He natna inkaichhawn awlsam tak mai tun hmaa monkeypox (zawnghri) tia hriat lar zawk hian Democratic Republic of Congo-ah mi 450 chuang nunna a la tawh a ni.
Central leh East Africa-ah darh tawhin scientists te chuan he disease variant thar inkaichhawn chak lutuk leh nunna chan an tam lutuk chuan hlauhthawnna nasa tak an neih phah a.
WHO chief tedros Adhanom Ghebreyesus chuan Africa mai bakah khawmualpui dang thlenga leng darh thei a nihna chu ‘hlauhthawnawm tak a ni’ tiin a sawi.
“He hrileng tihtawp a niha nunna chhanhim a nih theih nan khawvel huapa hmalakna kalpui ngai a ni,” tiin a sawi bawk.
Mpox hi inhnaihchilh tak atanga inkaichhawn theih natna niin mipat hmeichhiatna atang te, vun leh vun intawh atang te, hnai taka inthawkkhum atanga te a inkaichhawn theih a ni a.
Hritlang anga lang chhuakin vun a pilh theih bawk a, a kai zinga 100 atanga pali zelin nunna chan ang an ni.
Mpox hi chihnih Clade 1 leh Clade 2 a awm a. Mpox avanga kum 2022 a public health emergency lo puan tawh kha Clade 2 in a thlen a ni a. Tun tumah erawh hi chuan hlauhawm zawk tak Clade 1 leng mekin a kai zinga 10% vel zel chuan an thihpui a ni.
Nikum September thla atang khan virus chu inthlak danglamin chu chuan Clade 1b a hring chhuak a, inkaichhawn awl lutuk niin he variant hi scientists te chuan hlauhawm ber tiin an sawi.
Kumin kumtir atangin DR Congo-ah mpox kai mi 13,700 chuang hmuhchhuah tawh niin, hei bakah hian African ram dang Burundi, Central African Republic, Kenya leh Rwanda ah te pawh hmuhchhuah a ni tawh bawk.
Tuna mpox public health emergency a puan a nihna hian research, funding lamah nasa zawka hmalakna a thlen beisei niin khawvel pum huap anga hmalakna a tichak dawn bawk a ni.
July 2022 khan Clade 2 strain chak lo zawk chu khawvel ram hrang hrang 100-ah a darh hman tawh a, chung zingah chuan Europe leh Asia te pawh an tel a ni.
Khami tum khan khawvel pumah mpox kai mi 87,000 chuang awma chhut niin nunna chan mi 140 an awm niin WHO chuan a sawi.
Tute pawhin mokeypox hi an kai thei chungin a kai tam ber te chu mawngkawhur te an ni thung. Mpox len hnuhnung ber khan vulnerable group te vaccine pek niin hmehmih theihin a awm a ni a, tuna a leng leh mek hian hlauhthawnna a siam nasa hle a ni.