Agency ruat danah dan kalh a awm lo – ZPM Thalai

Agency ruat danah dan kalh a awm lo
– ZPM Thalai
Aizawl North II bialtu Dr Vanlalthlana’n a MLA Fund a hman danah dan kalh a awm loa, thu belhchian dawl lo hmanga beih a ni tih ZPM Thalai chuan an sawi.
ZPM Thalai Hqrs. thuchhuak chuan MLA Dr Vanlalthlana hian a bialah implementing agency atan dan hnuaia society registered thlap, Aizawl North Development Society (ANDS) chu 2022 February 23 khan MoU ziahpuiin, mipui hriat theihin TV leh chanchinbu lamah pawh pekchhuah a ni a. Implementing agency ruat a nih danah MLALADS (MLA fund) kaihhruaina dan engmah kalh a awm lo tih a sawi. Dr Vanlalthlana hian vengtina Local Development Committee WhatsApp group-ah an vengchhunga sanction a siamna lehkha a tarlang nghal zel tih sawiin, MLA fund a hman dan a puangzar zel ang hian MNF MLA-ten an puangzar ngam ve em, tih chu an zawhna a ni tih a sawi.
MLA Dr Vanlalthlana chungchang hi MNF Media & Publicity Department general secretary Pu VL Krosshnehzova chuan thu belhchian dawl lo leh thudik haiderin a bei niin ZPM Thalai hian sawiin, a beih chhan ber chu Pu VL Krosshnehzova hian MNF ticket-a Tawi biala din a beisei vangin a thiam ang angin lar a khel ve-ah an ngai a; inthehlar a tumnaah dawt thu leh thu belhchian dawl lo pawh a pawisa lo tih chu an hmuh dan a ni tih a sawi.
‘Dr Vanlalthlana aia NGO leh Sporting Club hnena MLA fund pe hnem MNF MLA zingah an awm kan ring loa, NGO leh Sporting Club hruaitute leh member-ten ngaihsaktu an neih avanga an lawm viau lai a, bialtu MLA-in anmahni a hnuaichhiah anga Pu VL Krosshnehzova’n a tarlang hi NGO leh Sporting Club-te hmusitnaah kan ngai. Pu VL Krosshnehzova’n Ramhlun South YMA Y-Section hna chungchanga Dr Vanlalthlana a beihna pawh hi hrereng chunga mimal inbeihnaah kan a ngai a, kha thilah khan file a kal thui hmain Dr Vanlalthlana hian a cancel vek a ni,’ ZPM Thalai thuchhuak chuan a ti.
ZPM MLA-te leh corporator-te fund hman that danin tun MLA term leh AMC term-ah hian Zoram a tuamchhuak mek a. ZPM MLA leh corporator-ten fund hman kawngah ZPM a sawrkar hma hauh atangin kalphung thar an thlen a ni tih chu mipuiin an hria tih ZPM Thalai hian an sawi bawk.