AI Summit-a tel turin Brazilian president-in India tlawh dawn

Brazilian President Luiz Inácio Lula da Silva-a chuan karleh hian AI Impact Summit-a tel turin India a tlawh dawn a, Prime Minister Narendra Modi-a nen pawh khawvel ram inkungkaihna boruak chiri tak karah inkawmin ram venhimna leh sumdawnna thil bakah thawhhona an neih sa tihngheh lehzual dan tur an sawi dun dawn.
Lula-a hian Modi-a sawmna angin February 18 atangin India a tlawh dawn a, New Delhi a tlawh tur hi nikuma US President Donald Trump-a’n ram hrang hrangte laka chhiah sang lak a puan hnu lawk khan pan a ni.
India leh Brazil hian nikum khan US-in chhiah a laksak chu 50% ve ve a ni a, Lula hian Brazil chuan eibarah ram dangte inkungkaihna siampui a tum thu sawi zuiin kawmngeih a tum zingah India pawh a tel.
February 19-20 chhunga AI Impact Summit-a a tel bakah hian Lula hi February 21-ah Modi-a nen an inkawm dawn niin external affairs ministry chuan a sawi a. President Droupadi Murmu, Vice President C P Radhakrishnan leh External Affairs Minister S Jaishankar te pawh a kawm ang.
Lula leh Modi hian ram pahnih inkara thawhhona awm mek kalpui dante an thlir dun ang a, an chhehvel boruak leh khawvela thil thleng mekte pawh an sawi dun dawn tih ministry chuan a tar lang.
Lula-a’n India a tlawh hi ram pahnihte tan ‘an inkar tihngheh lehzualna tur leh an inkar, an chhehvel leh khawvel huapa an ngaihdan leh pawm dan inhrilhna hun remchang’ a ni dawn tih ministry chuan a tar lang awk.
Lula-a hi minister 14 leh Brazilian CEO eng emaw zatin an zui dawn nia sawi a ni a. Minister a hruaitute hian India-a minister hrang hrangte, an hna chanpual ang changtute an kawm hlawm dawn a. CEO-te pawh hi sumdawnna thil sawihonaah telin sumdawn thila ram pahnih inkar huang zauh dan turte an sawiho dawn a ni.
An president-in a tlawh hma hian Brazilian thuneitute chuan India nena ram venhimna, technology leh sumdawnna inkungkaihna tha zawk a awm theih dan tur sawiin an inbe tawh a. Brazil hi Latin America-a India nena insumdawn tawn ram lian ber a ni a, an pahnih inkara sum che hi kum 2025 chhung khan a hma kum aia 25%-a thangin $ tluklehdingawn 15.21 a tling a, a hma kum chiah khan $ tluklehdingawn 12.2 a ni a. Indian bungrua thawh chhuah hi $ tluklehdingawn 8.35 man niin Brazil atangin $ tluklehdingawn 6.85 man a la lut thung.
Brazilian Navy, Indian Navy leh sorkar hnuaia mi, Mazagaon Dock Shipbuilders Ltd chuan December thla khan Scorpene tuihnuailawng enkawl dan tur chungchangah inremna ziak an lo siam tawh a. He tuihnuailawng hi ram pahnihin an hman mek a ni.
An thawhhona mek zingah hriselna thil, damdawi, energy, leilung hausakna vâng chi leh digital public infrastructure (DPI), AI leh vanthengreng huama thil thar chin chhuahna te pawh a tel bawk.
Lula-a’n tun tum India a tlawh dawn avang hian kum tawpah BRICS Summit-a tel loh tawh a tum niin sawi a ni a, an ram inthlan lo awm turah insawrbing zui a tum niin a hriate chuan an sawi.
Tun tum hi Lula-a’n India a tlawh vawi rukna tur niin kum 2004-a Republic Day lawmnaa khuallian a nih hnua a vawi khatna tur a ni thung a. Modi-a hian July, 2025 khan tlawh ve bawkin kum 57 hnuah Indian prime minister zinga tlawh leh hmasa ber a ni.